Роналду мухлисларига “Олтин тўп” учун раҳмат айтди

Футбол тарихидаги энг яхши тўпурар, португалиялик ҳужумчи Криштиану Роналду барча даврларнинг энг яхши “Олтин тўпи” сўровномасида унга овоз берган мухлисларга миннатдорлик билдирди. Бу ҳақда у ўзининг Instagram саҳифасида маълум қилди.

Аввалроқ, Роналду барча даврларнинг энг яхши “Олтин тўп” соҳиби деб топилгани ҳақида хабар берилган эди. Ташкилотчилар тарихдаги энг яхши “Олтин тўп” соҳибини аниқлаш учун пуллик овоз бериш жараёнини ўтказди. Сўровнома ғолиби 2008 йилда ушбу совринни қўлга киритган португалиялик футболчи бўлди. Ўша пайтда у “Манчестер Юнайтед” сафида тўп сурган ва жамоаси билан Англия Премьер-лигаси ҳамда Чемпионлар лигасида ғолиб чиққан эди. Бу Роналдунинг илк “Олтин тўпи” бўлган. Кейинчалик у яна тўрт марта ушбу мукофотга сазовор бўлди.

“Футбол мухлисларга тегишли! Бутун дунёдаги барча мухлисларга раҳмат. Барча даврларнинг “Олтин тўпи” ҳам сизники”,  деб ёзди Роналду.

Эслатиб ўтамиз, 2026 йилги “Олтин тўп”ни топшириш маросими жорий йилнинг 26 октябрь куни Лондонда бўлиб ўтди. 2025-2026 йилги мавсумнинг энг яхши футболчиси соврини Германиянинг “Бавария” клуби ҳужумчиси Ҳарри Кейнга топширилганди.