Роналду Мессини яна бир “мусобақа”да ортда қолдирди 

Кеча, 6 сентябрь куни Жаҳон чемпионатининг саралаш босқичида Португалия Арманистонни йирик – 5:0 ҳисобида мағлуб этди ва ўйинда португалийталик футболчи Криштиану Роналду яна бир тарихий натижани қайд этди. 

Учрашувдаги энг қизиқ жиҳат шундаки, барча голлар айнан Саудия Арабистони Про Лигасида тўп сураётган футболчилар томонидан урилди. Жоао Феликс ва Криштиану Роналду иккитадан гол уриб, дубль қайд этган бўлса, яна бир голни Жоао Канселу киритди. Шунингдек, Канселу битта голли узатма берди.

Қайд этиш жоиз, ҳозирда Жоао Феликс ва Криштиану Роналду “Аль-Наср” сафида тўп сурмоқда, Жоао Канселу эса “Аль-Ҳилол” жамоаси шарафини ҳимоя қилмоқда. Шу тариқа, Португалия йирик ғалабасининг бош қаҳрамонлари Саудия чемпионатида ўйнаётган футболчилар бўлди.

Ушбу ўйин Криштиану Роналду учун тарихий аҳамиятга эга, чунки Роналду Жаҳон чемпионати саралаш босқичларида урилган голлар сонини 37 тага етказиб, Лионель Мессини (36 та гол) ортда қолдирди ва иккинчи поғонага кўтарилди. Энди эса Роналду учун Карлос Руиснинг 39 та гол билан ўрнатган мутлақ рекордини янгилашга атиги 2 та гол кифоя қилади.

Бундан ташқари, Роналду умумий профессионал карьерасидаги голлар сонини 942 тага етказди. Мингинчи гол маррасигача эса унга бор-йўғи 58 та гол қолмоқда. Футбол тарихида минглик довонга чиқиш жуда камдан-кам футболчиларга насиб этади ва ҳозирча бундай имконият фақат Роналдунинг олдида турибди.