Роналду футбол тарихидаги биринчи миллиардерга айланди

Криштиану Роналду ўзининг афсонавий фаолиятига яна бир рекордни қўшди. Португалиялик юлдузнинг бойлиги 1,4 миллиард доллар деб баҳоланди ва у шу тариқа футбол тарихидаги биринчи миллиардер сифатида қайд этилди. Бу ҳақда “Bloomberg” хабар берди.

Манбага кўра, Роналдунинг бойлиги илк бор индексга киритилди ва у узоқ йиллик рақиби Лионель Мессидан ўтиб, спорт оламининг энг даромадли спортчиси сифатидаги мақомини мустаҳкамлади.

Йиллар давомида Роналдунинг бойлиги катта маошлар, реклама шартномалари ва шахсий бизнес лойиҳаларидан шаклланган. Унинг Европадаги ўйинчи сифатидаги даромади Мессиники билан ўхшаш бўлган бўлса-да, 2023 йилда Саудия Арабистонининг “Ал Наср” клуби билан шартнома имзолагани вазиятни тубдан ўзгартирди.

Мазкур келишув Роналдуга йилига 200 миллион долларлик маош ва бонусларни, шунингдек, 30 миллион долларлик шартнома имзолагани учун мукофотини ўз ичига олган. “Bloomberg” ҳисоб-китобига кўра, Роналду 2002 йилдан 2023 йилгача бўлган даврда 550 миллион доллардан ортиқ маош олган.

Унинг Nike билан тузилган узоқ муддатли шартномаси йилига 18 миллион доллар даромад келтиради. Шунингдек, Armani ва Castrol каби глобал брендлар билан ҳамкорликлар унинг умумий бойлигига катта ҳисса қўшган.

Майдон ташқарисида эса Роналду ўзининг CR7 бренди остида меҳмонхоналар, спорт заллари ва кийим-кечак линиясини ўз ичига олган бизнес империясини барпо этган. У, шунингдек, Португалиядаги энг қимматбаҳо кўчмас мулклардан бирига Quinta da Marinha гольф курортидаги 20 миллион еврога баҳоланган уйга эгалик қилади.

Маълумот учун, Роналду ижтимоий тармоқларда ҳам етакчи ҳисобланади. У Instagram'да 660 миллиондан ортиқ обуначига эга бўлиб, футболчи дунёдаги энг кўп кузатувчига эга шахс ҳисобланади.

Эслатиб ўтамиз, аввалроқ Роналду Portugal Football Globes тантанали маросимида Prestij мукофоти билан тақдирланган эди.