Роналду “Ал Наср” сафида ўйнашдан бош тортди

Португалиялик футбол юлдузи Криштиану Роналду “Ал Наср”нинг бугун, 2 февраль кунги “Ал-Риёд”га қарши учрашувида майдонга тушишдан бош тортди. Бу ҳақда журналист Фабрицио Романо хабар берди. 

Манбага кўра, футболчининг бу қарори Саудия Арабистони Давлат инвестиция жамғармаси (PIF)нинг клубга бўлган муносабати билан боғлиқ. Романо Роналдунинг мазкур ўйинда қатнашмаслиги ҳеч қандай жисмоний муаммо, юклама ёки спорт формаси билан боғлиқ эмаслигини билдирган.

Кейинчалик Португалиянинг “А Bola” нашри “Ал Наср”га яқин манбага таяниб, Роналду PIF’нинг клубга бўлган муносабатидан, айниқса жамғарма томонидан бошқариладиган рақиб жамоаларга нисбатан кўрсатилаётган эътибордан норози экани сабабли ўйнашдан бош тортганини маълум қилди.

Хусусан, лига пешқадами “Ал Ҳилол” клуби Роналду жамоасидан фарқли равишда мазкур клуб қишки трансфер ойнасида яна катта миқдорда маблағ ажратилишига эришган.

Маълумот учун, айни пайтда Криштиану Роналду Саудия Арабистони чемпионатида 17 та гол билан тўпурарлик пойгасида иккинчи ўринда бормоқда. “Ал Наср” эса 43 очко билан учинчи поғонани эгаллаб турибди. Жамоанинг “Ал Аҳли” билан очколари тенг бўлиб, пешқадам “Ал Ҳилол”дан 3 очкога ортда қолмоқда.