Роналду “Ал-Наср”ни тарк этмоқчи – ОАВ

Саудия Арабистонининг амалдаги чемпиони “Ал-Наср” клуби ҳужумчиси Криштиану Роналду жамоани тарк этиш эҳтимолини жиддий кўриб чиқмоқда. Бу ҳақда ўзининг Саудия Арабистонидаги манбаларига таяниб, “365Scores” нашри хабар берди.

Нашрнинг ёзишича, Ар-Риёд клубидаги манбалар Роналду жорий мавсум унинг “Ал-Наср”даги сўнгги мавсуми бўлиши мумкинлигини маълум қилган. Футболчи бу ҳақда клуб раҳбариятини хабардор қилган.

Қайд этилишича, “Ал-Наср” раҳбарияти Роналдуни шартномани узайтиришга ва жамоада яна бир неча мавсум қолишга кўндиришга ҳаракат қилмоқда. Бунга унинг спорт ва тижорат нуқтаи назаридан клуб учун муҳим аҳамиятга эгалиги сабаб бўлмоқда.

Шу билан бирга, клуб раҳбарияти португалиялик юлдуз учун катта хайрлашув учрашувини ташкил этиш имкониятини ҳам кўриб чиқмоқда. Ушбу тадбир орқали футболчининг жамоага қўшган ҳиссаси ва хизматларини эътироф этиш режалаштирилган.

Маълумот учун, Криштиану Роналду 2023 йил бошидан Ар-Риёд клуби шарафини ҳимоя қилиб келмоқда.

Эслатиб ўтамиз, аввалроқ Роналду Португалия терма жамоасидаги фаолиятини якунлаганини эълон қилганди. Роналду терма жамоа либосидаги илк учрашувини 2003 йил 20 август куни Қозоғистонга қарши ўтказган. У ўша баҳсда Луиш Фигу ўрнига майдонга тушган ва жамоаси 1:0 ҳисобида ғалаба қозонган.

Футболчи миллий жамоа сафида 234 та учрашувда иштирок этиб, 146 та гол урган ва 46 та голли узатмани амалга оширган. Шунингдек, унинг ҳисобида 10 та хет-трик бор.