Роберто Манчини яна Италия терма жамоаси бош мураббийи бўлади

Роберто Манчини Италия миллий терма жамоаси бош мураббийи этиб тайинланди. Бу ҳақда Италия футбол федерацияси (ИФФ) президенти Жованни Малаго “La Repubblica” нашрига берган интервьюсида маълум қилди.

Аввалроқ, Италия терма жамоаси бош мураббийлигига Андреа Пирло асосий номзод сифатида кўрилаётгани ҳақида хабарлар тарқалган эди. Бироқ унинг Россия букмекерлик компанияси билан ҳамкорлиги сабабли тайинлов амалга ошмаган. Шундан сўнг ИФФ техник директори Паоло Малдини ҳамда техник директор маслаҳатчиси Леонардо ўз лавозимларини тарк этган.

61 ёшли Манчини 2018-2023 йилларда ҳам Италия терма жамоасини бошқарган. Унинг қўл остида жамоа 2021 йилги Европа чемпионатида ғолиб чиққан, UEFA Миллатлар лигасида икки марта (2021 ва 2023) бронза медалини қўлга киритган ҳамда терма жамоалар ўртасидаги 37 ўйинлик мағлубиятсиз серияни қайд этган. Бироқ Манчини Италияни 2022 йилги Жаҳон чемпионатига олиб чиқа олмаган.

Италия терма жамоасидан кетгач, у Саудия Арабистони миллий жамоаси, кейин эса Қатарнинг “Ал-Садд” клубини бошқарди. Шунингдек, мураббийлик фаолияти давомида “Фиорентина”, “Лацио”, “Интер”, “Манчестер Сити”, “Галатасарой” ва “Зенит” клубларида ишлаган.

Маълумот учун, Манчини “Манчестер Сити” билан Англия Премьер-лигаси, Англия Кубоги ва Англия Суперкубогида ғолиб чиққан. “Интер” билан эса уч марта Италия чемпионлиги ва икки марта Италия Кубогини қўлга киритган.