Расман! Диоманде “Реал” сафига қўшилди

Кот-д’Ивуар терма жамоаси ярим ҳимоячиси Ян Диоманде Германиянинг “РБ Лейпциг” клубидан Испаниянинг “Реал Мадрид” жамоасига кўчиб ўтди. Бу ҳақда мадридликлар матбуот хизмати расман маълум қилди.

Футболчи билан тузилган шартнома 2033 йил 30 июнга қадар амал қилади.
Маълумотларга кўра, “Реал Мадрид” Диоманде учун “РБ Лейпциг”га 125 миллион евро ҳамда қўшимча 15 миллион евро бонус тўлайди. Шу тариқа, бу трансфер клуб тарихидаги энг қиммат битимга айланди.

Диоманде трансфери, шунингдек, Африка футболи тарихидаги энг қиммат трансфер сифатида ҳам қайд этилди. Бу борадаги аввалги рекорд 2019 йилдан бери Кот-д’Ивуарлик Николя Пепега тегишли эди. У ўша йили Франциянинг “Лилль” клубидан Англиянинг “Арсенал” жамоасига 80 миллион евро эвазига кўчиб ўтган.

Диоманде “Реал Мадрид”нинг жорий трансфер ойнасидаги олтинчи янги футболчиси бўлди. Ундан аввал жамоа Ибраҳима Конате, Дензел Думфрис, Марк Кукурелья, Бернарду Силва ва Карлос Эспини ўз сафига қўшиб олган эди.

Маълумот учун, 19 ёшли Диоманде 2025 йил ёзида Испаниянинг “Леганес” клубидан “РБ Лейпциг” сафига ўтган эди. У немис клуби таркибида барча мусобақаларда 36 та учрашувда иштирок этиб, 13 та гол урди ва 10 та голли узатмани амалга оширди.

Кот-д’Ивуар терма жамоаси сафида эса 14 та ўйинда майдонга тушиб, 3 та гол ва 1 та голли узатма муаллифи бўлган. Шунингдек, 2026 йилги Жаҳон чемпионатида 4 та учрашувда қатнашиб, битта гол урган.