Расман: АҚШда демократлар Конгресс назоратини қайтариб олди

АҚШ Демократик партияси оралиқ сайловлар якунларига кўра Конгресснинг Вакиллар палатаси ва Сенатда кўпчилик ўринни қўлга киритди. Бу ҳақда “Bloomberg” хабар берди.

Нашр томонидан эълон қилинган Сенатдаги ўринлар тақсимоти харитасида демократлар 51 та ўрин кўрсаткичига етди. Шу тариқа, улар 100 ўринли Конгресснинг юқори палатасида мустақил кўпчиликни таъминлайди.

Сайловларга қадар республикачилар Сенатни назорат қилиб, демократлар ва уларнинг фракциясига кирувчи мустақил сенаторларнинг 47 та ўрнига қарши 53 та ўринга эга эди. Кўпчиликни қўлга киритиш учун демократларга ўзларининг барча ўринларини сақлаб қолган ҳолда республикачилардан камида тўртта ўринни тортиб олиш талаб этилар эди.

ОАВ прогнозларига кўра, Демпартия, шунингдек, Вакиллар палатаси устидан ҳам назоратни қўлга киритади. “Bloomberg” ҳисоб-китобларига кўра, у Республикачилар партиясидан саккизта ўринни тортиб олган. Бу уларга кўпчилик учун зарур бўлган кўрсаткичдан икки баравар кўп.

Кеча, 3 ноябрь куни АҚШда Конгрессга оралиқ сайловлар бўлиб ўтди. Унгача республикачилар ҳар иккала палатани назорат қилаётган эди. Вакиллар палатасида сайловчилар барча 435 нафар конгрессменни, Сенатда эса 100 нафар қонунчидан 35 нафарини сайлашлари керак эди.

АҚШ Президенти Дональд Трамп “New York Times” газетасига берган интервьюсида Конгрессга оралиқ сайловлар натижаларини тан олишга ва Демократик партия вакиллари билан ишлашга тайёрлигини маълум қилди.