Раньери Италия терма жамоасини бошқаришга тайёрлигини билдирди

Мураббийлик фаолиятини якунлашини эълон қилган Клаудио Раньери Италия миллий терма жамоаси бош мураббийи ёки менежери лавозимини эгаллашга тайёр эканини маълум қилди. Бу ҳақда у “Sky Sport” нашрига берган интервьюсида сўз очди.

Раньери 2025 йил ёзида Италияни бошқариш имкониятидан воз кечганди. Шундан сўнг, у “Рома” клубида юқори маслаҳатчи сифатида фаолият юритди. Апрель ойида эса, пойтахт клубини тарк этди.

“Олдин “Рома”даги фаолиятим сабабли рад жавобини бергандим, чунки иккисини бирлаштира олмасдим. Ҳозир эса бўшман, шунинг учун таклифни кўриб чиқишим мумкин”, дейди Раньери.

Италия терма жамоасининг аввалги бош мураббийи Женнаро Гаттузо жорий йилнинг 3 апрель куни терма жамоа 2026 йилги Жаҳон чемпионатига чиқа олмаганидан кейин истеъфога чиққанди.

74 ёшли Раньери мураббийлик фаолияти давомида 2009–2011, 2019 ва 2024–2025 йилларда “Рома”ни бошқарган. Шунингдек, у “Кальяри”, “Наполи”, “Фиорентина”, “Парма”, “Ювентус”, “Интер” ва “Сампдория” клубларида ишлаган.

Бундан ташқари, Раньери “Челси”, “Фулхэм”, “Уотфорд” ҳамда 2016 йилда Англия Премьер-лигаси чемпионлигини қўлга киритган “Лестер Сити” жамоаларига ҳам мураббийлик қилган.

У, шунингдек, “Валенсия”, “Атлетико Мадрид”, “Монако”, “Нант” ҳамда Греция терма жамоасида ҳам фаолият олиб борган.

Маълумот учун, Ўзбекистонлик ҳужумчи Элдор Шомуродов Клаудио Раньери билан асосан “Каляри” ва “Рома” клубларида бирга ишлади. Уларнинг ҳамкорлиги тахминан бир ярим мавсум давом этди.

Шомуродов айниқса Раньери бошқарувидаги “Рома”да ўзининг энг яхши даврларидан бирини ўтказди. 2024/25-йилги мавсумда ўзбекистонлик футболчи барча мусобақаларда 34 та ўйинда майдонга тушиб, 7 та гол ва 5 та ассист қайд этди.