Рамос Европага қайтишга тайёрланмоқда

“Реал Мадрид” клубининг собиқ ҳимоячиси Серхио Рамос 2026 йилги Жаҳон чемпионатида иштирок этиш учун оптимал спорт формасини сақлаб қолишни мақсад қилган. Шу сабабли  Рамос Мексиканинг “Монтеррей” клубидан кетиб, Европага қайтишга тайёргарлик кўрмоқда. Бу ҳақда “World soccer talk” нашри хабар берди.

Манбага кўра, Рамоснинг Европага қайтишга қарор қилишига икки асосий омил туртки бўлган. Биринчиси унинг оиласи Испанияга қайтишни истамоқда. Иккинчиси эса Испания терма жамоаси бош мураббийи Луис де ла Фуэнтени ўзининг юқори савияда ўйнаш қобилиятига яна бир бор ишонтириш умиди.

Рамоснинг фикрича, испанча футбол услубига яқинроқ бўлган чемпионатда ва юқори даражадаги мусобақаларда мунтазам ўйнаш унга терма жамоага қайтиш имконини беради. Бу борада Аймерик Ляпортнинг мисоли муҳим ҳисобланади. У Саудия Арабистонини тарк этиб, Испания федерацияси ёрдамида “Атлетик Билбао”га қайтганида миллий жамоага қайта чақирилди.

Серхио Рамос 2021 йилда Косовога қарши ўйинда жароҳат олганидан бери терма жамоа сафида майдонга тушмаган. Шу сабабли у Евро-2020, ЖЧ-2022 ёки Евро-2024 мусобақаларида иштирок эта олмади. Шунга қарамай, Рамоснинг “Монтеррей”даги даври муваффақиятсиз бўлмади. У клублар ўртасидаги жаҳон чемпионатида майдонга тушди, турнирда гол урди ва ўзининг юқори даражадаги ҳимоявий маҳоратини сақлаб қолаётганини кўрсатди.

Маълумот учун, Серхио Рамос Испания миллий терма жамоаси билан 2008 ва 2012 йилги Европа чемпионатини ва 2010 йилги Жаҳон Чемпионати ғолиблигини қўлга киритган.