Рамазон Темиров Стив Эрцегни 1-раундда нокаутга учратди (видео)

Ўзбекистонлик аралаш яккакураш (MMA) жангчиси Рамазон Темиров Абу-Дабида (БАА) бўлиб ўтган UFC Fight Night 282 турнирида муддатдан олдинги ёрқин ғалабани қўлга киритди. У UFC камарига собиқ даъвогар Стив Эрцегни нокаутга учратди.

Оқшомнинг асосий кардидан олдинги жангда энг енгил вазн тоифаси вакили UFC чемпионлик камарига собиқ даъвогар, австралиялик Стив Эрцег билан тўқнаш келди. Темиров жангнинг илк дақиқаларини фаол ўтказди ва биринчи раунд якунланишига 40 сония қолганда рақибини нокаутга учратди. Рефери 4:20 сонияда жангни тўхтатиб, ўзбекистонлик спортчининг муддатдан олдинги ғалабасини қайд этди.

Шу тариқа, Темиров ўзининг профессионал рекорд кўрсаткичини 20 та ғалабага етказди (3 та мағлубият). Бу шунингдек, унинг фаолиятидаги биринчи раундда эришган 11-нокаути бўлди.

29 ёшли ўзбекистонлик спортчи учун бу UFC’даги кетма-кет учинчи ғалаба бўлди. Аввалроқ, у Си Жей Вергарани муддатдан олдин мағлуб этган ва ҳакамларнинг якдил қарори билан Чарльз Жонсонни енгган эди.

Эрцег эса профессионал фаолиятидаги бешинчи мағлубиятини қабул қилиб олди – унинг янгиланган статистикаси 14-5 ни ташкил этмоқда. Австралиялик жангчи 2024 йилнинг май ойида Алешандре Пантожа билан жангда UFC чемпионлик унвони учун курашган эди.