Путиннинг Шимолий Кореяга бориш куни аниқ бўлди

Россия Президенти Владимир Путин жорий йилнинг 18-19 июнь кунлари давлат ташрифи билан Корея Халқ Демократик Республикасида бўлади. Бу ҳақда Кремль матбуот хизмати хабар берди.

Келтирилишича, КХДР раиси Ким Чен Иннинг таклифига биноан, Путин икки кун давомида ушбу давлатда бўлади.

Маълумот учун, Шимолий Корея етакчиси Ким Чен Ин 2023 йил сентябрида Путиннинг таклифига биноан Россияга расмий ташриф билан келган эди. Россия Федерацияси КХДР чегаралари ёпилган коронавирус пандемияси бошланганидан бери Шимолий Корея раҳбари ташриф буюрган биринчи давлат бўлди. Ўшанда 10 сентябрь куни Ким Чен Ин Пхеньяндан Россияга махсус поездда йўл олганди. 12 сентябрь куни Россияга келган Ким Чен Ин Табиат вазири Александр Козлов ва Приморск ўлкаси губернатори Олег Кожемяко билан музокара ўтказди. 

13 сентябрда Шимолий Корея етакчиси Президент Путин билан “Восточный” космодромида учрашди. Улар қисқа суҳбатдан сўнг космодромдаги объектларни кўздан кечирди. Кейин эса давлат раҳбарлари бошчилигидаги делегацияларнинг музокаралари бўлиб ўтди. Шундан сўнг, Ким Чен Ин шарафига расмий тушлик уюштирилганди. 

Россиянинг шарқига ташриф буюрган Ким Чен Ин эндиликда Россия Президентини ўзи учун қулай вақтда жавоб ташрифига таклиф қилди.

Шу билан бирга, Путин 19-20 июнь кунлари Вьетнамга боради. Россия ва Вьетнам ўртасидаги савдо-иқтисодий, илмий-техникавий ва гуманитар соҳаларда ҳар томонлама стратегик шерикликни янада ривожлантиришнинг ҳолати ва истиқболларини муҳокама қилиш, шунингдек, халқаро ва минтақавий кун тартибидаги долзарб масалалар юзасидан фикр алмашиш режалаштирилган.