Путиннинг қизи “узоқ умр кўриш лабораторияси”ни очди

Кеча, 19 октябрь куни “Сколково” Москва бошқарув мактабида умр кўриш давомийлигини оширишнинг давлат сиёсати, иқтисодиёт ва меҳнат бозорига таъсирини ўрганиш бўйича лаборатория ишга туширилди. Бу ҳақда “Ведомости” хабар берди.

Қайд этилишича, ушбу воқеа билан боғлиқ форумда Россия Президенти Владимир Путиннинг қизи ва Тиббиёт илмий-таълим институти директори Мария Воронцова чиқиш қилган. У узоқ умр кўришни икки босқичга бўлиш кераклигини айтган. Биринчи босқичда инсон “табиат томонидан берилган 85-90 ёшлик потенциални яшаб ўтиши” керак. Бунинг учун болаликдан соғлиқ ҳақида қайғуриш одатини шакллантириш, тўғри овқатланиш ва мунтазам равишда шифокор кўригидан ўтиб туриш зарур, деб ҳисоблайди Воронцова.

Иккинчи босқич эса, унинг сўзларига кўра, “Худони ёки табиатни алдаш” ва инсоннинг табиий имкониятлари чегарасидан чиқишга бўлган уринишни ифодалайди. Воронцова бу соҳадаги илмий муваффақиятлар ҳозирча камтарона эканини тан олган. Унинг нуқтаи назарича, узоқ умр кўриш йўлидаги тўсиқлардан бири – қаришнинг касаллик деб ҳисобланмаслигидир. Натижада унга қарши курашадиган препаратларни ишлаб чиқиш қийинлашмоқда, чунки бу жараён аниқ ташхис ва клиник синовларни талаб қилади. 

Шу билан бирга, Воронцова “умуминсоний ўлим қўрқуви” соғлиқни сақлаш тизимини 10-20 йилдан кейинроқ қариш муаммосини ҳал қилишга ундашига ишонч билдирган.

Маълумот учун, бундан олдинроқ Россия Фан ва олий таълим вазири ўринбосари Денис Секиринский Россияда қаришга қарши вакцина – ҳужайраларнинг ёш билан боғлиқ ўзгаришлари билан алоқадор генни блоклайдиган препарат ишлаб чиқиш бошлаганини маълум қилган. Бу иш билан Қариш биологияси ва тиббиёти институти шуғулланмоқда.

Бундай дори воситасини ишлаб чиқаришни 2028-2030 йилларга бориб йўлга қўйишни Бош вазир ўринбосари Татьяна Голикова ҳам ваъда қилган. Ишланмалар Путиннинг талаби билан 2025 йилда ишга туширилган “Соғлиқни сақлашнинг янги технологиялари” миллий лойиҳаси доирасида олиб борилмоқда. Кремлга яқин “Медуза” манбасининг айтишича, ташаббусга Президентнинг дўсти, “абадий ҳаёт ҳақида хаёл сурадиган” ва генетика соҳасидаги маҳаллий ишланмалар бўйича федерал дастурни назорат қиладиган Курчатов институти раҳбари Михаил Ковальчукнинг “хаёлига ўрнашиб қолган ғояси” сабаб бўлган. Бу дастурда Воронцова ҳам иштирок этмоқда.

Шунингдек, 2025 йилда Путиннинг талаби билан “Узоқ ва фаол ҳаёт” миллий лойиҳаси ишга туширилган. Унга ва “Соғлиқни сақлашнинг янги технологиялари”га умумий ҳисобда 2 триллион рублдан ортиқ маблағ сарфлаш режалаштирилмоқда. Президент Россияда ўртача умр кўриш давомийлигини 2030 йилгача 78 ёшга, 2036 йилгача эса 81 ёшга ошириш вазифасини қўйган. Ҳозирда у 74,2 ёшга тенг.

Путиннинг ўзи 74 ёшда. Мамлакатнинг аксарият олий мансабдор шахслари ҳам тахминан шу ёшда, Россияда эркакларнинг ўртача умр кўриш давомийлиги эса 68 ёшни ташкил этади.

ОАВ маълумотларига кўра, Путин азалдан организмни ёшартириш мавзусига қизиқади. 2025 йил сентябрь ойида Пекинга ташрифи чоғида у Хитой етакчиси Си Цзиньпин билан замонавий технологиялар ва аъзоларни кўчириб ўтказиш (трансплантация) ёрдамида абадийликка эришиш имкониятини муҳокама қилган эди. Ўшанда Си Путинни “ушбу асрдаёқ 150 ёшгача яшаш имконияти борлигига” ишонтирган эди.