Путин ва Зеленскийнинг учрашувини ташкиллаштиряпман – Трамп 

АҚШ Президенти Дональд Трамп Россия Президенти Владимир Путин ва Украина Президенти Владимир Зеленский ўртасидаги учрашувни ташкиллаштиришни бошлаганини маълум қилди. Бу ҳақда у ўзининг Truth Social ижтимоий тармоғида маълум қилди.

Трамп бугун кечқурун Оқ уйда Европа етакчилари билан учрашувлар чоғида Путин билан бу масалани телефон орқали муҳокама қилганини ёзди.

“Учрашувлар якунида мен Президент Путинга қўнғироқ қилдим ва икки раҳбар ўртасида белгиланган жойда учрашувни ташкиллаштиришни бошладим. Ушбу музкаралар бўлиб ўтгандан сўнг, бизда уч томонлама учрашув бўлади, бу икки Президент ва менинг учрашувимиз бўлади. Яна бу деярли тўрт йилдан бери давом этаётган уруш учун жуда яхши, эрта қадам”, деб ёзган Трамп.

Трамп иккала учрашув ҳам қачон бўлишини очиқламади. Унинг сўзларига кўра, бугунги учрашувлари Украина учун “Америка Қўшма Штатлари билан мувофиқлаштирилган ҳолда турли Европа давлатлари томонидан тақдим этиладиган” хавфсизлик кафолатлари атрофида бўлади.

“Ҳамма Россия/Украина учун ТИНЧЛИК имкониятидан жуда хурсанд”, деб ёзган Трамп.