Путин Украинанинг сулҳ таклифларини “экзотик” деб атади

Россия Президенти Владимир Путин Украина уруши бўйича Москвага келиб тушаётган тинчлик ташаббусларини “қабул қилиб бўлмайдиган” ва “экзотик” деб атади. Унинг баёноти Кремль сайтида эълон қилинди.

Россия раҳбари Россия томони музокаралар учун фақатгина жанговар тўқнашув чизиғидаги жорий вазиятни ҳисобга олган ҳолда очиқ эканини қайд этган. 

“Бизга етказилаётган таклифлар баъзан, мен айтган бўлардимки, экзотик хусусиятга эга ва қабул қилиб бўлмайдиган. Биз ҳар доим тинчлик ҳақидаги мулоқотга тайёрмиз, лекин фақат жойларда шаклланаётган реалликлар асосида”, дейди Россия етакчиси.

Президентнинг сўзларига кўра, Россия ҳарбийлари Украина иқтисодиётининг муҳим секторларига жиддий босим ўтказмоқда. Шу муносабат билан Киев ўз қарорларининг оқибатларига дуч келиб, юзага келган вазиятдан чиқиш йўлларини излаш учун воситачилар орқали алоқа ўрнатишга ҳаракат қилмоқда.

Тилга олинган “экзотик” таклифларнинг моҳияти ҳақидаги аниқлаштирувчи саволга жавоб берар экан, Путин тафсилотларга тўхталмасликни афзал кўргна ва фақат бу каби ғоялар илгари ҳам илгари сурилганини, аммо ҳозирда улар янги контекстда тақдим этилаётганини таъкидлаган. Шу билан бирга, Россия етакчиси ушбу босқичда келажакдаги келишувларнинг аниқ асосларини муҳокама қилишга ҳали барвақт эканини урғулаган.

Эслатиб ўтамиз, аввалроқ Украина Президенти Владимир Зеленский Россия-Украина урушида ҳал қилувчи босқич энди ҳаво майдонида кечаётганини айтиб, Россия Президенти Владимир Путинга таҳдид қилган эди.