Путин Украинага қарши урушни кучайтирмоқчи – ОАВ

Россия Президенти Владимир Путин яқин ойларда Украинага қарши ҳарбий ҳаракатларни янада кучайтириши мумкин. Бу ҳақда “Reuters” хабар берди.

Манбаларга кўра, Украинанинг Россиядаги нефтьни қайта ишлаш заводлари ва портларига берган сўнгги дрон зарбалари Путиннинг урушни давом эттириш борасидаги қарорини янада мустаҳкамлаган. Исми ошкор этилмаган манбалардан бири можаронинг яқин ойларда кескинлашиш эҳтимоли юқори эканини билдирган.

Қайд этилишича, Путин Донбасснинг Украина назоратида қолаётган қисмини эгаллашни урушдаги асосий мақсад деб ҳисобламоқда. Шунингдек, у Россия яқин орада Донбасс устидан тўлиқ назорат ўрнатишига ишонмоқда.

Мазкур маълумотлар АҚШ Президенти Дональд Трампнинг жорий йилнинг 7 июль куни Путин урушни тугатишни истаётгани ва можарони ҳал қилиш одамлар ўйлагандан ҳам яқинроқ эканини айтганидан сўнг янграган.

Кремль матбуот котиби Дмитрий Песков “Reuters”га берган изоҳида Россия можарони тинч йўл билан ҳал қилишга тайёрлигини, бироқ махсус ҳарбий операцияни давом эттириш учун етарли имкониятларга эга эканини билдирган.

Зеленский идорасининг юқори мартабали вакили эса сўнгги ойлардаги разведка маълумотлари Путиннинг тинчлик музокараларига эмас, балки урушни кенгайтиришга тайёрланаётганини кўрсатаётганини айтган. Унга кўра, Россия Украинада янги ҳарбий операциялар бошлаши ёки Европанинг бошқа давлатларига қарши ҳаракат қилиши эҳтимолдан холи эмас.

Эслатиб ўтамиз, аввалроқ Украина Президенти Владимир Зеленский Россия–Украина урушида ҳал қилувчи босқич энди ҳаво майдонида кечаётганини айтиб, Россия Президенти Владимир Путинга таҳдид қилган эди.