Путин Украинадаги 30 кунлик сулҳга рози, бироқ… (видео)

Россия АҚШнинг Украинада вақтинчалик ўт очишни тўхтатиш таклифига рози, бироқ ҳар қандай сулҳ узоқ муддатли тинчлик ва можарога сабаб бўлган омилларнинг бартараф этилишига олиб келиши керак. Бу ҳақда бугун, 13 март куни Россия Президенти Владимир Путин Беларусь резиденти Александр Лукашенко билан ўтказилган қўшма матбуот анжуманида сўз очди.

“Биз жанговар ҳаракатларни тўхтатиш бўйича таклифларга розимиз, бироқ бу тўхташ шундай бўлиши керакки, у узоқ муддатли тинчликка олиб келсин ва ушбу инқирознинг дастлабки сабабларини бартараф этсин”, деди Путин.

АҚШ ва Украина вакилларининг жорий йил 11 март куни Саудия Арабистонининг Жидда шаҳрида ўтказилган музокаралари натижасида Киев агар Москва ҳам шундай қадам ташласа, 30 кунлик сулҳга рози эканини маълум қилди.

“Бу ғоя ўз-ўзидан тўғри ва биз, албатта, уни қўллаб-қувватлаймиз. Бироқ биз муҳокама қилишимиз керак бўлган масалалар бор. Ўйлайманки, америкалик ҳамкорларимиз билан музокаралар ўтказиш лозим. Балки АҚШ Президенти Трамп билан боғланиб, у билан биргаликда бу масалани муҳокама қилиш керакдир. Лекин, бу можарони тинч йўл билан якунлаш ғояси биз томонидан қўллаб-қувватланади”, деди Путин.

Путиннинг таъкидлашича, муҳокама қилиниши зарур бўлган масалалар қаторига жанговар тўқнашув чизиғида сулҳ режимига риоя этилишини назорат қилиш, Россиянинг Курск вилоятида қолаётган украиналик ҳарбийлар тақдири ҳамда Украинага Ғарб томонидан қурол етказиб берилиши каби жиҳатлар киради.

Эслатиб ўтамиз, аввалроқ Владимир Путиннинг ёрдамчиси Юрий Ушаков “Россия-1” телеканалига берган интервьюсида Москва Украинада вақтинчалик сулҳга қарши ва узоқ муддатли низони ҳал этишдан манфаатдор эканини айтган эди. Путиннинг ёрдамчиси, шунингдек, Москва Вашингтоннинг Россиянинг Украина бўйича позициясини тушунишига умид қилишини ва сулҳни муҳокама қилиш жараёнида бу ҳисобга олиниши кераклигини таъкидлаган. У шу тариқа оммавий ахборот воситаларида пайдо бўлган Россиянинг Вашингтонга сулҳ шартлари бўйича ўз талабларини етказгани ҳақидаги хабарларга изоҳ берган.