Путин учун Уралда “Қиёмат куни бункери” қурилди

Свердловск вилоятининг шимолида “Грот” (1335-сонли объект) шартли номи остида махфий объект барпо этилди. У алоқа учун зарур бўлган муайян частотадаги радиотўлқинларни ўтказувчи тоғ жинсларидан иборат Косьвинский Камень тоғи ичида яширилган. Бу ҳақда ушбу улкан бункерни қуриш ва жиҳозлашга оид ҳужжатларни, шунингдек, очиқ манбалардаги маълумотлар ва объектга алоқадор шахсларнинг хабарларини ўрганган “Досье” маркази, “Danwatch” ва “The Sunday Times” тадқиқотчилари хабар берди.

Олинган маълумотларга кўра, “Грот” – Ғарбда “Dead Hand” (“Ўлик қўл”) сифатида танилган, ҳокимият томонидан модернизация қилинган “Периметр” стратегик ядро кучларини захирадан бошқариш тизимининг асосий тугунидир.

1970 йилларда “Периметр”ни ишлаб чиқишда иштирок этган, 2005–2010 йилларда эса уни модернизация қилишга раҳбарлик қилган истеъфодаги генерал-майор Виктор Халиннинг сўзларига кўра, Президент Владимир Путин 2005 йилнинг май ойида тизимнинг янги бошқарув бўғинини қуриш тўғрисидаги махфий фармонни имзолаган. 2010 йилга келиб янги тизим синовдан ўтказилган ва “Грот”га юборилган. 2020 йилга келиб тоғ яқинида ҳарбий шаҳарча қад ростлаган. Мамлакат раҳбарияти йўқ қилинган тақдирда автоматик режимда қасос ядро зарбасини йўллаши керак бўлган стратегик объектнинг ўзи тоғ ичида жойлашган бўлиб, у ерости хоналари ва тоннеллар, радиомарказлар, алоқа ва ҳаётни таъминлаш тизимлари, шунингдек, стратегик ядро кучларини бошқариш аппаратурасини ўз ичига олади.

Халиннинг тушунтиришича, Россия раҳбарияти 1335-объект туфайли “қасосни ҳам автоматлаштирилган, ҳам автоматик режимда”, яъни якуний қарорни қабул қилишда инсон иштирокисиз амалга ошириш воситасига эга бўлган. Таққослаш учун: Совет “Периметр”ида сўнгги “тугмани босиш” машина эмас, балки навбатчи офицерлар чекига тушар эди. Ўрганилган ҳужжатлардан кўринишича, тизимнинг тўлиқ автоматик режимда ишлаганига оид далиллар мавжуд эмас.

Стенфорд университети профессори, америкалик ядро қуролларини тарқатмаслик бўйича мутахассис Жеффри Льюиснинг ҳисоблашича, Кремль “Грот”ни “барқарорлаштирувчи элемент” – Россия раҳбарларига “кўпроқ ишонч ва вақт” берадиган восита деб билади. 

“Улар буни қандайдир карикатуравий ёвуз бўлганликлари учун қилишаётгани йўқ. Улар қалбан ўзларини беқарор ҳис қилганликлари учун шундай йўл тутишмоқда. АҚШ Путинга нисбатан Эрон етакчиси билан қилган ишини такрорлаши мумкинлигидан хавотирдалар”, дейди у.

Давлат харидларининг ўрганилган ҳужжатларига кўра, қурилиши 1982 йилда бошланган объект учун 22 минг тонна пўлат ва 56 минг тонна цемент етказиб берилган. Ҳисоб-китобларга кўра, ушбу материаллар миқдоридан Москва метросининг ёндош тоннеллари билан биргаликдаги иккита йирик замонавий бекатини қуришга етадиган даражада бетон ишлаб чиқариш мумкин эди.

Эслатиб ўтамиз, аввалроқ Сочида Владимир Путиннинг бузиб ташланган “Бочаров ручей” қароргоҳи ўрнида янги комплекс қурилиши якунланаётгани ҳақида хабар берилган эди.