Путин Трампнинг одамлари билан 3 соат музокара ўтказди (видео)

Кеча, 5 сентябрь куни Россия Президенти Владимир Путин АҚШ Президенти Дональд Трампнинг вакиллари Стив Уиткофф ва Жаред Кушнер билан музокара ўтказди. Бу ҳақда ТАСС хабар берди.

Путиннинг америкалик музокарачилар билан учрашуви тахминан 3 соат давом этган. Кремль музокара Москва вақти билан соат 19:55 да бошланганини эълон қилган ва у тахминан соат 23:00 да тугаган.

Уиткофф ва Кушнер билан музокараларда Путиннинг ёрдамчиси Юрий Ушаков ҳамда Президентнинг инвестициявий-иқтисодий ҳамкорлик бўйича махсус вакили ва Россия тўғридан тўғри инвестициялар жамғармаси раҳбари Кирилл Дмитриев иштирок этган. 

Уиткофф Путин билан мулоқот у учун энг эсда қоларли хотиралардан бирига айланишини айтган. 

“Истеъфога чиққанимизда эслашимиз мумкин бўлган жуда кўп воқеалар бўлади ва сиз билан мулоқот энг яхши ва энг эсда қоларлиларидан бири бўлади”, дейди у учрашув давомида.

Юрий Ушаковнинг айтишича, томонлар Украина урушини ҳал этиш бўйича “мазмунли ва конструктив” суҳбат ўтказган.

“Россия томонидан “махсус ҳарбий операция” ўтказилиши давомида юзага келаётган вазиятга аниқ ва батафсил баҳо берилди. Хусусан, жанговар ҳаракатлар зонасида Россия армиясининг илгарилашидаги реал муваффақиятлари қайд этилди, қўйилган мақсадларга эришишга ишонч билдирилди ва, албатта, низонинг барча туб сабабларини бартараф этиш зарурлиги таъкидланди. Президентимиз америкаликлар билан биргаликда сиёсий-дипломатик ечимларни излаш бўйича ишларни давом эттириш кайфиятида эканини тасдиқлади”, дейди Ушаков.

Москвадан сўнг Уиткофф ва Кушнер Киевга ташриф буюриши керак.

“Стив Уиткофф ва Жаред Кушнер эртага Киевдаги алоқалар давомида шахсан Россия Президентидан олинган Украинадаги низони мустаҳкам тинч йўл билан ҳал этишга чиқишга оид кузатувлар ва баҳоларни ишлатишга ваъда беришди. Америкалик вакиллар ушбу сафарга жиддий тайёргарлик кўришган. Улар томонидан нафақат жанговар ҳаракатларни тезроқ тугатишдан анъанавий манфаатдорлик билдирилди, балки низони ҳал этишнинг эҳтимолий йўллари ҳақида бир қатор мулоҳазалар ҳам шакллантирилди”, дейди у.

Ушаковнинг сўзларига кўра, Кремлдаги музокараларда иқтисодий мавзулар ва эҳтимолий Россия-Америка лойиҳалари ҳам муҳокама қилинган.

“Умуман олганда, музокаралар ўз вақтида ўтказилганини ва иккала томон учун ҳам жуда фойдали бўлганини айтиш мумкин. Икки мамлакатимиз Президентлари бундан буён ҳам шахсий алоқаларни ушлаб туришлари, шунингдек, Стив Уиткофф ва Жаред Кушнер йўналиши бўйича ишлар давом эттирилиши тасдиқланди”, дейди у.

Эслатиб ўтамиз, Уиткофф ва Кушнер Москвага кеча, 5 сентябрь куни кундузи етиб келганди. Внуково аэропортида уларни Дмитриев кутиб олди. Энди америкалик музокарачилар Украина етакчиси Владимир Зеленский билан музокаралар ўтказиш учун Киевга жўнаб кетиши керак. “Bloomberg” манбаларининг маълумотларига кўра, Киев музокаралардан сезиларли илгарилашни кутмаяпти.

АҚШ Президенти Дональд Трамп аввалроқ Уиткофф ва Кушнерни “ажойиб музокарачилар” деб атаган. Улар “мукаммал иш қилган” ва Россия-Украина урушини якунлаш бўйича таклиф тақдим этишлари керак. Трампнинг сўзларига кўра, таклиф янги эмас.

Путиннинг кўрсатмасига биноан, Уиткофф ва Кушнернинг у ерга ташрифига тайёргарлик кўриш муносабати билан 5 сентябрь ярим кечасидан бошлаб Киевга зарба бериш 3 кунга тўхтатилди. Украина Президенти Владимир Зеленский ҳам шунга ўхшаш йўл тутди.