Путин келаси ойда Марказий Осиёга келади

Россия Президенти Владимир Путин жорий йил 9 октябрь куни давлат ташрифи билан Тожикистонга келади. Бу ҳақда Россия Ташқи ишлар вазири ўринбосари Александр Панкин маълум қилди.

“Мамлакатларимиз Президентлари икки томонлама ҳамкорликка асос солиб, бугунги оғир дунёда дўстлик қандай сақланиб қолиши ва қандай сақланиши кераклигини шахсий мисолида кўрсатмоқда. Жорий йилнинг 9 октябрь куни Россия Федерацияси Президенти давлат ташрифи билан Тожикистон Республикасига келади”, деди олий мартабали дипломат Тожикистон элчихонасида Республика Мустақиллик кунига бағишланган тантанали қабулда.

Панкин Путиннинг ташрифи кўп томонлама алоқалар ривожига янги кучли туртки бериши ва икки томонлама алоқаларни ривожлантиришнинг янги векторларини топиш имконини беришига ишонч билдирди.

Қайд этиш жоиз, октябрь ойида Душанбеда “Марказий Осиё – Россия” саммити ва МДҲ давлат раҳбарлари Кенгаши йиғилиши ўтказилиши режалаштирилган. 18 август куни Россия Президенти Владимир Путин Тожикистон Президенти Имомали Раҳмон билан телефон орқали суҳбатлашганда ушбу тадбирларга тайёргарлик масалалари ҳам муҳокама қилинганди.

Эслатиб ўтамиз, Қозоғистон Президенти Қосим-Жомарт Тўқаев кеча, 8 сентябрь куни халққа йўллаган мурожаатида  жорий йил охирида Россия ва Ўзбекистонга ташрифлари бўлиб ўтишини айтганди.