Путин Алиевни туғилган куни билан табриклади

Россия Федерацияси Президенти Владимир Путин озарбайжонлик мавқедоши Илҳом Алиевни туғилган куни билан табриклаб, унинг икки давлат ўртасидаги иттифоқчилик ҳамкорлигини мустаҳкамлашга қўшган шахсий ҳиссасини қайд этди. 

"Ҳурматли Илҳом Ҳайдарович, сизни туғилган кунингиз билан чин қалбимдан табриклайман. Сизнинг раҳбарлигингизда дўст Озарбайжон ижтимоий-иқтисодий тараққиёт йўлидан дадил қадам ташлаб, халқаро майдонда ўз мавқеини мустаҳкамламоқда. Давлатларимиз ўртасидаги иттифоқчилик муносабатларини йўлга қўйиш ва мустаҳкамлашга қўшган шахсий ҳиссангизни ортиқча баҳолаш қийин”, дейилади табрик телеграммасида. 

Путин ишончли дўстлик муносабатларини чин дилдан қадрлашини билдирган. 

“Ишончим комилки, биз икки томонлама ва минтақавий кун тартибидаги долзарб масалалар бўйича яқин ҳамкорликдаги ишимизни давом эттирамиз", деб таъкидланади табрик мактубида. 

Путин Алиевга сиҳат-саломатлик, фаровонлик ва муваффақиятлар тилаган. 

Бугун, 24 декабрь куни Илҳом Алиев 61 ёшга тўлди.