Президентнинг қизи отасига овоз бермасликка чақирди

Африка қитъасида жойлашган Камерун Республикасининг амалдаги президенти Поль Бийянинг ягона қизи Бренда Бийя ижтимоий тармоқдаги саҳифасида Камерун аҳолисини отасига овоз бермасликка чақирди. Бу ҳақда “Аfrican News” хабар берди.

Маълум бўлишича, 27 ёшли Бренда Бийя Швейцарияда туриб видео олган ва унда ота-онаси билан барча алоқаларни узганини, оиласи унга ёмон муносабатда бўлганини ва унинг ўлимини хоҳлаётганини айтган. Шунингдек, у Камерун аҳолисини келаси ойда бўлиб ўтадиган сайловларда саккизинчи марта қатнашаётган 92 ёшли отаси Поль Бийяга овоз бермасликка чақирган.

Бренданинг сўзларига кўра, дунёнинг энг кекса раҳбари бўлган отаси Поль Бийя ўзининг 43 йиллик бошқаруви давомида Марказий Африка мамлакатида қашшоқлик, ишсизликни кучайишига сабабчи бўлган ва халқини азоб-уқубатларга дучор қилган.  

“Умид қиламанки, бизда бошқа президент бўлади. Мен Поль Бийяга овоз бермайман”, деган Бренда ижтимоий тармоққа жойлаган видеода.

Маълумот учун, 92 ёшли Бийя 1982 йилдан бери президентлик қилади. Камерунда президентлик сайловлари 2025 йил 12 октябрга белгиланган ва бир турда ўтказилади. Оддий кўпчилик овоз олган номзод ғалаба қозонади. Президентлик муддати 7 йил.

2008 йилда Бийя президентлик муддатини чеклашни олиб ташлади, бу эса унга чексиз муддатга ўз номзодини қўйиш имконини берди. У 2018 йилда бўлиб ўтган сўнгги сайловларда мухолифатнинг кенг тарқалган қонунбузарликлар ҳақидаги даъволарига қарамай, 71,28 фоиз овоз билан ғалаба қозонган эди.

Бийянинг ўтмишдоши, Камеруннинг биринчи президенти бўлган Аҳмадоу Бабатур Аҳиджо 1982 йилда соғлиғи сабабли истеъфога чиққанди. У 22 йил давомида давлатни бошқарган.

Бунёд Келдибоев