Португалия ЖЧ саралаш баҳслари олдидан 2 футболчисини йўқотди

Португалия терма жамоасининг жаҳон чемпионати саралаш босқичида ҳал қилувчи икки учрашуви – Ирландия ва Арманистонга қарши ўйинларда икки асосий ҳужумчиси жароҳат олди. Педру Нету ва Педру Гонсалвеш жароҳат туфайли терма жамоа йиғинини ўтказиб юборади. Бу ҳақда Португалия футбол федерацияси матбуот хизмати хабар берди.

Педру Нетунинг сафдан чиқиши “Челси” тиббий жамоаси ва FFP саломатлик бўлими билан маслаҳатлашувлардан сўнг қабул қилинган. Футболчининг жисмоний ҳолати инобатга олинган ҳолда, Нету UEFA Чемпионлар лигасидаги “Қорабоғ”га қарши ўйинни ўтказиб юборган эди, бироқ Премьер-лига доирасида “Бўрилар”га қарши майдонга тушган.  Шу билан бирга, у ҳали тўлиқ тикланмаган.

Педру Гонсалвеш эса жорий йилнинг 8 ноябрь куни “Спортинг”нинг “Санта-Клара”га қарши ўйинида жароҳат олган. FFP маълумотларига кўра, у терма жамоа йиғинига қўшилган, бироқ тиббий кўриклардан сўнг футболчининг терма жамоага ёрдам бера олмаслиги аниқ бўлган.

Шу сабабли, бош мураббий Роберто Мартинез Жаҳон чемпионати саралаш босқичи учун йиғинга чақирилган 26 нафар футболчилар рўйхатини 24 га қисқартилди.

Маълумот учун, Португалия терма жамоаси жорий йилнинг 14 ноябрга ўтар кечаси Ирландия билан ва 16 ноябрь куни Арманистон билан мундиал йўлланмаси учун баҳс олиб боради.