Пентагонда жиддий кўламдаги қинғирликлар аниқланди

АҚШнинг Ҳисоб палатаси Пентагонда (АҚШ Мудофаа департаменти) содир бўлган молиявий қинғирликларнинг ҳажмини аниқлаб бўлмаслигини билдирган ҳолда, уларни “потенциал равишда катта” деб атади ва Мудофаа департаментини фирибгарлик хавфларини бошқариш борасидаги ислоҳотларни жадаллаштиришга чақирди. Бу ҳақда Ҳисоб палатасининг ҳисоботи эълон қилинди.

“Пентагон фаолиятига таъсир қилаётган фирибгарликнинг тўлиқ миқёси номаълум, бироқ бу жиддий бўлиши мумкин. Сўнгги етти йил ичида тасдиқланган фирибгарлик ҳолатлари 11 миллиард долларни ташкил этди – бу эса хавфларнинг атиги кичик бир қисмини ташкил қилади”, дейилади ҳисоботда.

2019 йилдан бери Ҳисоб палатаси Пентагонга 17 тавсия берган бўлса-да, шулардан атиги 4 таси амалга оширилгани қайд этилган.

“Масалан, фирибгарлик хавфларини бошқаришга оид, хусусан, маълумотлар таҳлили асосида олдини олиш, аниқлаш ва чоралар кўриш бўйича тавсияларни жорий этиш орқали вазирлик 100 миллион доллар ва ундан кўпроқ маблағни тежаши мумкин”, дейилади ҳужжатда.

Палата аудиторлари илгари аниқлаган бир ҳолатни ҳам эслатиб ўтган: Пентагон сохта компаниядан яроқсиз эҳтиёт қисмлар харид қилган ва бу 47 та қирувчи самолётнинг парвозларини тўхтатишга сабаб бўлган.