Олтин ва кумуш нархи тарихий максимумга етди

Бугун, 20 январь куни Нью-Йорк товар биржаси Comex’да қимматбаҳо металлар нархи тарихий энг юқори кўрсаткичларни янгилади. Бу ҳақда савдо маълумотларида келтирилган. 

Эрталабки савдолар якунига кўра, олтиннинг биржа нархи бир троя унцияси учун 4 736,9 АҚШ долларини ташкил этган. Ўсиш 3 фоиздан ошган. Савдо майдончаси маълумотларига кўра, олтиннинг бир троя унцияси учун 4,7 минг АҚШ долларидан юқори нархи тарихда илк бор қайд этилган.

Кумуш ҳам ўзининг максимал тарихий қийматига етган. Қимматбаҳо металл нархи бир троя унцияси учун 95 АҚШ долларидан ошган ва ўсиш 7,5 фоиздан кўпроқни ташкил этган.

Қимматбаҳо металлар нархининг кескин ошиши АҚШ Президенти Дональд Трампнинг февраль ойи бошидан бошлаб қатор Европа давлатларига нисбатан божлар жорий этилиши ҳақидаги баёноти билан боғлиқ.

Эслатиб ўтамиз, жорий йилнинг 17 январь куни Трамп 1 февралдан АҚШ га импорт қилинадиган айрим Европа давлатлари маҳсулотларига 10 фоизлик божлар кучга киришини эълон қилган эди. Ушбу рўйхатга Дания, Норвегия, Франция, Швеция, Германия, Буюк Британия, Нидерландия ва Финляндия киритилган. Трампнинг огоҳлантиришича, июнь ойидан бошлаб Европадан импорт қилинадиган маҳсулотларга божлар 25 фоизгача оширилади ва Америка Гренландияни сотиб олиш бўйича келишувга эришмагунча ушбу чоралар сақланиб қолади.