“Олтин тўп”нинг асосий фаворити аниқланди

“WhoScored” статистика портали 2026 йилги “Олтин тўп”га номзод 30 футболчининг ўртача рейтингларига асосланган ҳолда ўз рейтингидаги кучли бешликни эълон қилди. Унга кўра, “Интер Майами” ва Аргентина терма жамоаси ҳужумчиси Лионель Месси биринчи ўринни эгаллади.

“WhoScored” маълумотларига кўра, Мессининг ўртача рейтинги 8,28 баллни ташкил этган. Аргентиналик футболчи 2026 йилги Жаҳон чемпионатида 8 та гол ва 4 та голли узатма қайд этиб, терма жамоаси билан финалга қадар етиб борди. Унинг Жаҳон чемпионатидаги ўртача рейтинги 8,82 балл бўлган.

“WhoScored” рейтингида кучли бешлик қуйидагича кўриниш олди:

• Лионель Месси (“Интер Майами” – Аргентина) – 8,28;
• Ламин Ямаль (“Барселона” – Испания) – 8,23;
• Ҳарри Кейн (“Бавария” – Англия) – 8,14;
• Килиан Мбаппе (“Реал Мадрид” – Франция) – 7,70;
• Эрлинг Ҳоланд (“Манчестер Сити” – Норвегия) – 7,53.

Бу Мессининг фаолиятидаги 17-номинацияси бўлди. Бу кўрсаткич бўйича у 18 марта номзод бўлган Криштиану Роналдудан кейин иккинчи ўринда турибди. Месси “Олтин тўп” номзодлари рўйхатига 2023 йилдан кейин биринчи марта киритилди.

Шунингдек, 39 ёшли футболчи биринчи ва охирги номинациялари орасида 20 йиллик фарқ бўлган тарихдаги илк футболчига айланди. Месси илк бор 2006 йилда “Олтин тўп”га номзод бўлган.

Аргентиналик футболчи фаолияти давомида “Олтин тўп”ни рекорд даражада саккиз марта – 2009, 2010, 2011, 2012, 2015, 2019, 2021 ва 2023 йилларда қўлга киритган.

Маълумот учун, 2026 йилги “Олтин тўп” тақдимот маросими жорий йилнинг 26 октябрь куни Лондонда бўлиб ўтади.

Эслатиб ўтамиз, аввалроқ 2026 йилги “Олтин тўп” мукофоти учун якуний 30 нафар номзодлар рўйхати эълон қилинди.