Олмалиқда янги олтин саралаш фабрикаси қурилмоқда 

Ўзбекистонда қимматбаҳо металлар ишлаб чиқариш ҳажмини ошириш ҳамда табиий бойликлардан самарали фойдаланиш мақсадида кенг кўламли саноат лойиҳалари амалга оширилмоқда. 

Шундай муҳим лойиҳалардан бири Олмалиқ кон-металлургия комбинатининг “Ковулди олтин саралаш фабрикаси қурилиши” лойиҳасидир.

Янги фабрика “Ковулди” ва “Қуйи-Кенжасой” конларида қазиб олинадиган маъданларни қайта ишлашга мўлжалланган бўлиб, йилига 200 минг тонна хомашёдан қимматбаҳо металларни ажратиб олади.

Фабриканинг қурилиш ишлари жорий йилнинг февраль ойида бошланган бўлиб, 2025 йил 4-чорагида фойдаланишга топширилиши режалаштирилган.  

Эътиборлиси, қурилиш ишларини  комбинатнинг “Олмалиқметаллургқурилиш” трести амалга оширмоқда.  Айни пайтда лойиҳа доирасида ер майдонини тайёрлаш, маъмурий-маиший биноларнинг пойдеворини қуриш ва ишлаб чиқариш биноси учун 54 та темир-бетон колонна ҳамда 530 та тўсиқ ўрнатиш ишлари бажарилди.

Фабрика қурилишининг иккинчи босқичида технологик ускуналар – тегирмонлар, гидроциклонлар ва классификаторлар ўрнатилади. Ускуналар ҳам комбинатнинг Марказий таъмирлаш-механика заводи томонидан маҳаллийлаштириш дастури асосида тайёрланмоқда. Шу кунгача 2 та тегирмон, 2 та гидроциклон ва бошқа эҳтиёт қисмлар тайёрланди.

Фабрика ишга туширилгач, қўшимча 151 та янги иш ўрни яратилади.

Маълумот учун, комбинатда Ангрен кон бошқармаси  ва  Наманган вилоятидаги Чодак кон бошқармаларида ҳам олтин саралаш фабрикалари мавжуд.

Реклама ҳуқуқи асосида