Олий Рада Украинадаги ҳарбий ҳолатни узайтирди

Украина Олий Радаси мамлакатдаги ҳарбий ҳолат режимини, шунингдек, умумий сафарбарликни яна 90 кунга – 2025 йил 7 февралгача узайтирди. Бу қарорни бугун, 29 октябрь куни овоз беришда қатнашган барча 311 депутат қўллаб-қувватлади.

Раданинг яна 29 нафар аъзоси овоз бермади.

Украина Миллий хавфсизлик ва мудофаа кенгаши котиби Александр Литвиненко яна 160 минг кишини ҳарбий хизматга чақириш режасини эълон қилди. Унинг сўзларига кўра, бу бўлинмаларни керакли ходимларнинг 85 фоизигача бўлган ходимлар билан таъминлаш имконини беради.

“Айни пайтда Украина Қуролли Кучлари сафига жами 1,05 миллион киши чақирилган”, деб ёзади UNIAN агентлиги.

2022 йил 24 февралда Россиянинг кенг кўламли босқинидан сўнг Украина ҳарбий ҳолат ва умумий сафарбарлик эълон қилди. Ҳарбий ҳолат ва сафарбарлик ҳар 90 кунда янгиланади. Ҳарбий ҳолат даврида, бошқа нарсалар қатори, сайловларга йўл қўйилмайди.

2024 йил баҳорида Украинада сафарбарлик тўғрисидаги янги қонун кучга кирди. Август ойида янги нормалар кучга кирганидан сўнг ҳарбий хизматга мажбур бўлганларни муддатли ҳарбий хизматга чақириш кўрсаткичлари 2,5 баробарга ошгани маълум қилинган эди.
Эслатиб ўтамиз, олдинроқ Украина Президенти Владимир Зеленский Олий Радага (парламент) ҳарбий ҳолат ва умумий сафарбарликни 90 кунга узайтиришни маъқуллашни таклиф қилганди.