Оқ уй яқинидаги отишмани руҳий касал содир этган – ОАВ

Оқ уй яқинида отишма уюштирган шахс 21 ёшли Насир Бест экани аниқланган. У Мэриленд штатида яшаган. Бу ҳақда “Fox News” хабар берди.

Манбаларга кўра, АҚШ Махфий хизмати агентлари томонидан яраланган гумондор шифохонага олиб кетилаётган пайтда вафот этган.

Телеканаллар маълумотига кўра, Бест аввал ҳам ҳуқуқ-тартибот органлари эътиборига тушган ва руҳий касалликдан азият чеккан.

ОАВнинг хабар беришича, у 2025 йил 26 июнда Махфий хизмат агентларига таҳдид қилгани учун қўлга олинган. Шунингдек, 2025 йил 10 июлда тақиқланган ҳудудга киргани сабаб яна ушланган.

“New York Post” ёзишича, Бест ўзини Исо Масиҳ деб ҳисоблаган. Манбаларга кўра, у Пенсилвания авенюси ва 17-кўча чорраҳасида олдинга-орқага юриб юрган пайтда кузатувга тушган. Тахминан соат 18:10 да у Оқ уй назорат-ўтказиш пунктига қарата ўқ узган.

У бир неча марта ўқ узишга улгурган, шундан сўнг Махфий хизмат агентлари жавоб ўқи очиб, уни яралаган.

Хабарларга кўра, аввалроқ суд томонидан унга Оқ уйга яқинлашишни тақиқловчи қарор ҳам чиқарилган эди. Шунга қарамай, у Оқ уй ҳудудидаги турникетдан ўтишга уринган, бироқ полиция ва Махфий хизмат ходимлари томонидан қўлга олинган.

Суд ҳужжатларида Бестнинг “мен Исо Масиҳман ва ҳибсга олинмоқчиман” деган сўзлари ҳам қайд этилган.

Эслатиб ўтамиз, 24 майга ўтар кечаси Вашингтондаги Оқ уй яқинида ўқ овозлари янграганди. Ҳодиса 17-кўча ва Пенсильвания авенюси чорраҳасида содир бўлган. Журналистлар зудлик билан майсазордан Оқ уй ичкарисига киритилган ва уларга жойларидан жилмаслик буюрилган. Шундан сўнг, Махфий хизматнинг винтовкалар билан қуролланган агентлари бино олдида навбатчиликни бошлашган.

Воқеа содир бўлаётган вақтда АҚШ Президенти Дональд Трамп қароргоҳ ичида бўлган.