ОИВни топган олим вафот этди

Францияда инсон иммунитет танқислиги вируси (ОИВ) ни кашф этгани учун Нобел мукофоти совриндори бўлган машҳур француз олими Люк Монтанье вафот этди. Бу ҳақда бугун, 10 февраль куни “Либерасьон” газетаси хабар берди.

Нашр маълумотига кўра, 89 ёшли олим 8 февраль куни Парижнинг Нейи-сюр-Сен чеккасида жойлашган Америка шифохонасида яқинлари қуршовида вафот этган. Ўлим сабаби аниқланмаган. Маълумот бугун муниципалитет мэриясида, шунингдек, фан оламининг бир қанча вакиллари, жумладан, таниқли француз инфеционисти Дидье Рауль томонидан тасдиқланган.

Монтанье 1983 йилда вирусолог Франсуаза Барре-Синусси билан бирга ОИВни кашф этгани учун 2008 йилда Нобел мукофотига сазовор бўлган. Ўша йили мукофотни икки француз билан баҳам кўрган совриннинг учинчи ғолиби бачадон бўйни саратонини келтириб чиқарадиган папилломавирусларни кашф этган немис вирусологи Харальд цур Хаузен бўлган.

Илмий соҳадаги ютуқларига қарамай, мукофотни олганидан кейин Монтанье бир неча бор илмий жамоатчиликда салбий реакцияга сабаб бўлган баёнотлар билан чиқди. Хусусан, 2009 йилда у кучли иммунитет яхши парҳез билан бир неча ҳафта ичида ОИВни енгиб ўтишини айтди. Шунингдек, у аутизм спектрининг бузилиши бактериал келиб чиқишга алоқадорлигини ва уни антибиотиклар билан даволаш мумкинлигини таъкидлади. 2017 йилдан бери у эмлашнинг хавфлилиги ҳақида бир неча бор баёнотлар берди ва коронавирус пандемияси даврида у эмлашга қарши намойишларда қатнашди ҳамда COVID-19 га қарши эмланиш ўлим билан баробарлигини бонг урди.