Одамлар кўчиб келган кўп қаватли уйга нега лифт ўрнатилмаган? Вазирлик мужмал изоҳ берди

Жорий йилнинг 23 апрель куни ижтимоий тармоқларда Андижон шаҳрида жойлашган кўп қаватли турар-жойда лифт мавжуд эмаслиги ва бир қатор муаммолар борлиги бўйича эълон қилинган хабар тарқалди. Ҳолат юзасидан Қурилиш ва уй-жой коммунал хўжалиги вазирлиги расмий муносабат билдирди.

Таъкидланишича, Андижон вилояти Андижон шаҳар 1 кичик даҳа Нодира кўчасида жойлашган 7 қават мансардали бинода сотиш жараёнида ваъда берилган лифт аҳоли кўчиб келганига 4-5 ой бўлганига қарамай ҳалигача ўрнатилмаган. Шунингдек, турар-жойнинг подъезд қисми яроқсиз таъмирлангани бу борада шаҳар ҳокимлигига мурожаат қилингани айтиб ўтилган.

Бундан ташқари, мурожаатчи “Я.Д.М.” МЧЖ томонидан 2020 йилда қуриб битказилган мазкур кўп қаватли бинонинг ертўласи сотиб юборилгани ҳамда ертўла қисмида тинимсиз сув тошиб кетаётгани ҳақида ҳам гапириб ўтган.

Қурилиш ва уй-жой коммунал хўжалиги вазирлиги эса фақатгина лифт муаммосига тўхталиб, ҳозирда пудратчи томонидан лифт қўйиш ишлари бошланганлиги ва тез орада монтаж ишлари якунланишини маълум қилган. Айни пайтда лифт учун электр симларини тортиш ва 1-қаватда лифт эшикларини ўрнатиш ишлари бошланганлигини айтаётган вазирлик мурожаатчи тилга олган бошқа бир қатор муаммоларга изоҳ бермаган. Шунингдек, ташкилот кўп қаватли уй лифти нега одамлар кўчиб келганидан сўнг ўрнатилаётганини ҳам тушунтирмаган.

Нурмуҳаммад Файзуллаев