Nvidia раҳбари ишқий можаролар ортидан истеъфога чиқди

Кеча, 12 ноябрь куни Nvidia бош директори Женсен Хуанг истеъфога чиқди. Бу ҳақда компания матбуот хизмати хабар берди.

Баёнотда айтилишича, компания директорлар кенгаши Хуанг зудлик билан Nvidia президенти, бош ижрочи директори ва бошқарув аъзоси лавозимларини тарк этиши ҳақида қарор қабул қилган. Ижрочи вице-президент ва молия директори Колетт Кресс компаниянинг вақтинчалик раҳбари этиб тайинланган. У доимий раҳбар тайинлангунига қадар Nvidia’ни бошқаради. Кресс, шунингдек, вице-президент ва молия директори вазифаларини бажаришда давом этади. У 2013 йилда Nvidia’га келганидан буён ушбу лавозимларни эгаллаб келмоқда. Компанияга таркибига қўшилгунига қадар у қарийб 25 йил давомида етакчи технологик компанияларда, жумладан, Cisco ва Microsoft’да молиявий лавозимларда ишлаган.

“Бошқарув доимий бош директорни излашга киришмоқда ва ички ҳамда ташқи номзодларни кўриб чиқади”, дейилади хабарда.

Бундан ташқари, Nvidia тарихида илк бор директорлар кенгаши раиси тайинланган. Бу лавозимни Харви К. Жонс эгаллаган.

“Колетт Nvidia’га ақл бовар қилмас ўсиш даврини бошдан кечиришда ёрдам берди ва бизнесимиз, мижозларимиз, операцияларимиз ҳамда молиявий ҳолатимизни чуқур тушунади. Директорлар кенгаши Колетт ва раҳбарият жамоасига тўлиқ ишонади ва биз компания фаолияти, мижозлар олдидаги мажбуриятлар ҳамда маҳсулотларни ишлаб чиқиш режаси узилишларсиз давом этишини кутмоқдамиз”, дея таъкидлайди компания директорлар кенгаши раиси Харви Жонс.

Эслатиб ўтамиз, жорий йил ноябрь ойи бошида Женсен Хуанг ўзининг фамилиядоши, хитойлик тадбиркор ва Nvidia чипларининг харидори бўлган Сингапурнинг Megaspeed компанияси асосчиси Элис Хуанг билан ишқий муносабатда бўлганликда гумон қилинган эди. NYT маълумотларига кўра, Америка махсус хизматлари ушбу аёлни Хитой разведкаси билан ҳамкорлик қилишда гумон қилмоқда. Пекин эса бу айбловларни рад этди.

Ушбу хабарлар фонида Женсен Хуанг хотинига хиёнат қилганини оммавий равишда тан олди. У рафиқаси ва фарзандларидан узр сўради, бироқ муносабатда бўлган аёлнинг исмини ошкор қилмади.

Бир неча кундан сўнг “The New York Times” Nvidia’нинг беш нафар собиқ ва амалдаги ходимига таяниб, Хуанг компаниянинг соғлиқни сақлаш йўналиши бўйича вице-президенти, 48 ёшли Кимберли Пауэлл билан ҳам ишқий муносабатда бўлганини хабар қилди. У бевосита Хуангнинг қўл остида ишлайди. Шу билан бирга, Элис Хуанг ҳам, Кимберли Пауэлл ҳам бошқа инсонлар билан никоҳда.

Жорий ҳафта бошида “Reuters” инвесторлар Nvidia ва Хуангга қарши жамоавий даъво аризаси киритгани ҳақида ёзди. Компания ва унинг бош директори бизнесменнинг Megaspeed раҳбари билан алоқаларини яшириш орқали акциядорларни алдаганликда айбланмоқда. 12 ноябрь куни “The Wall Street Journal” Nvidia директорлар кенгашининг Хуангни истеъфога чиқариш режаси ҳақида хабар берди. Орада Nvidia фондининг акциялари 10 фоизга қулади.

“Bloomberg Economics” Хуангнинг ишдан бўшатилиши сунъий интеллект соҳасида Хитой билан кечаётган пойгада АҚШ позицияларига зарар етказиши мумкинлигини прогноз қилмоқда. Айни пайтда АҚШ Президенти Дональд Трамп Nvidia раҳбарини қўллаб-қувватлади ва унинг ўз лавозимида қолиши тарафдори эканини билдирди.

Женсен Хуанг 1993 йилда Крис Малаховски ва Кёртис Прием билан биргаликда Nvidia компаниясига асос солган ва шундан буён 33 йил давомида компанияга раҳбарлик қилиб келган. Nvidia капиталлашуви бўйича ($4,2 трлн) Apple’дан кейин дунёдаги иккинчи компания ҳисобланади.