Нукусда 2 яшар бола доридан заҳарланиб вафот этди

Нукусда 2 яшар бола циперметрин – ўсимликларни зараркунандалардан ҳимоя қилиш воситасидан заҳарланиб вафот этди. Бу ҳақда Қорақалпоғистон Республикаси Прокуратураси хабар берди. 

Қайд этилишича, жорий йилнинг 27 январь куни соат 08:40 да 2020 йили туғилган вояга етмаган М.А ва унинг 2004 йилда туғилган акаси Б.Б. республика Шошилинч тез тиббий ёрдам илмий марказининг ҳудудий филиалига заҳарланиш ташхиси билан олиб келинган. 

Кўрсатилган шошилинч тиббий ёрдамга қарамасдан вояга етмаган М.А. шу куни шифохонада вафот этган, унинг акаси Б.Б. кўрсатилган тиббий муолажалардан кейин соғайиб, 30 январда уйига рухсат берилган.

Вояга етмаган Б.Б. шифохонада шифокорларга 25 январь куни озиқ-овқат дўконидан тез тайёрланадиган лапша сотиб олиб, укаси билан бирга истеъмол қилганини билдирган. Мазкур маълумотларнинг ҳаққонийлиги қонунда белгиланган тартибда текширилмасдан туриб, жорий йилнинг 28 январь куни ижтимоий тармоқларда Нукус шаҳрида “Болалар лапшадан заҳарланган” деган мазмунда нотўғри хабарлар тарқатилган.  

Прокуратура органлари томонидан тегишли мутахассислар иштирокида ўтказилган текширишда озиқ-овқат дўконида сотувга қўйилган лапша маҳсулотлари мувофиқлик сертификатига эга бўлиб, улар таркибида токсик элементлар аниқланмаган.

Мазкур ҳолат бўйича 27 январда Нукус шаҳар прокуратураси томонидан олиб борилган терговга қадар текширув ҳаракатлари давомида заҳарланган фуқаролар хонадони кўздан кечирилганда, омборхонасида сақланаётган қопда ўткир ҳидли модда борлиги аниқланиб, ашёвий далил тариқасида олинган.

Суд-тиббиёт экспертизаси хулосасига кўра, М.А.нинг ўлими органофосфор бирикмаси (циперметрин) билан ўткир заҳарланиш ва нафас олиш етишмовчилигидан келиб чиққани, қонида топилган циперметрин моддаси марҳумнинг уйидан ашёвий далил тариқасида олинган модда таркиби билан бир хил эканлиги аниқланган.

Вояга етмаган Б.Б.га нисбатан ўтказилган экспертиза хулосасида ҳам, у айнан циперметрин моддаси таъсирида заҳарлангани кўрсатилган.

Ўзбекистон Республикаси Қишлоқ ва сув хўжалиги вазирлигининг 2014 йил 29 апрелдаги 103-сонли бўйриғига кўра, циперметрин ўсимликларни зараркунандалардан ҳимоя қилиш воситаси сифатида фойдаланишга рухсат этилган.

Ҳолат юзасидан сўралган вояга етмаган Б.Б. ўз кўрсатмасида отаси Қ.Б.нинг кўрсатмасига асосан, 25 январь куни уйининг ички қисми ва атрофига кемирувчиларга қарши ўткир ҳидли моддани сепиб чиққанини баён қилган.

Терговга қадар текширув давомида хонадон эгаси Қ.Б. ўғли Б.Б.нинг кўрсатмаларини тасдиқлаб, ўғли сепганидан кейин қолган моддаларни қопи билан омборхонасига сақлаш учун қўйганини баён қилиб, ҳолат юзасидан ҳеч кимга эътирози йўқлигини билдирган.

Терговга қадар текширув натижасига кўра, жорий йилнинг 22 февраль куни жиноят ишини қўзғатишни рад қилиш ҳақида қарор қабул қилинган.