Норвегия ЖЧ қуръасини танқид қилди

Кеча, 5 декабрь куни футбол бўйича Жаҳон чемпионатининг гуруҳ босқичига қуръа ташлаш маросими бўлиб ўтди. Маросимдан сўнг Норвегия футбол ассоциацияси президенти Лисе Клавенесс қуръа боришини кескин танқид қилди.

“Бугун бўлган нарсани жиддий қабул қилолмайман. Биз ҳушёр бўлишимиз, вазиятни назоратда ушлашимиз ва FIFA бундай шоулар эмас, аввало футболни биринчи ўринга қўйиши кераклигини таъкидлашимиз лозим”, деди у.

Маросим бошланиши билан меҳмон бўлмаган биринчи жамоаларнинг қуръа ташлашигача 87 дақиқалик танаффус бўлгани норозиликларга сабаб бўлди. Шу вақт ичида Андреа Бочелли, Робби Уильямс, Николь Шерзингер ва Лорин Хилл саҳнага чиқди, шунингдек, АҚШ Президенти Дональд Трампга FIFA Тинчлик мукофоти тақдим этилди.

“Агар мукофотнинг аниқ мезонлари бўлмаса, ҳакамлар ҳайъати ёки бошқарув билан боғлиқлиги йўқлиги сезилса, бу ташкилотни сиёсийлаштиришнинг нозик усулига айланиб қолади. Бу сегмент ҳаддан ташқари узун бўлди ва маросимда ўз ўрнида эмас эди”, дейди Лисе Клавенесс FIFA Тинчлик мукофоти ҳақида.

Норвегия терма жамоаси бош мураббийи Столе Сольбаккен ҳам NRK телеканалига берган қисқа интервьюсида маросим ташкилотчиларидан мамнун эмаслигини яширмади:

“Бу кўп жиҳатдан ғалати шоу эди. Буни очиқ айтишим керак”, дейди Столе Сольбаккен.

Маълумот учун, Норвегия терма жамоаси қуръада Франция, Сенегал ва (Ироқ, Боливия, Суринам) қитъалараро плей-офф ғолиби билан бирга “И” гуруҳидан жой олди.