Нипаҳ вирусидан ўлим ҳолати қайд этилди

Бангладеш шимолида Нипаҳ вирусини юқтирган аёл вафот этди. Ўлим ҳолатини Жаҳон соғлиқни сақлаш ташкилоти (ЖССТ) ҳам тасдиқлаган. Бу ҳақда “The Independent” хабар берди.

Қайд этилишича, беморда дастлабки аломатлар жорий йилнинг 21 январь куни пайдо бўлган. Касаллик иситма, тутқаноқ, бош оғриғи билан кечган, шундан сўнг кучли сўлак ажралиши кузатилган. Орадан бир ҳафта ўтиб аёл вафот этган. Унинг ташхиси ўлимидан кейин тасдиқланган.

Бемор билан алоқада бўлган 35 киши тиббий кузатувга олинган, уларнинг тест натижалари манфий чиққан. Янги касалланиш ҳолатлари аниқланмаган.

Қайд этиш жоиз, бунгача ЖССТ Ҳиндистонда пайдо бўлган Nipah вирусининг ўлим кўрсаткичи 40 фоиздан 75 фоизгача эканини маълум қилган эди. Юқтириб олмаслик учун меваларни яхшилаб ювиш ва ҳайвонлар билан ниқоб ҳамда қўлқопсиз алоқа қилмаслик тавсия этилади.

Эслатиб ўтамиз, аввалроқ Нипаҳ вируси сабабли Ўзбекистонга Ҳиндистондан тирик ҳайвонлар ва қушларни олиб келиш тақиқлангани ҳақида хабар берилган эди.

Ўзбекистон Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабековга кўра, мамлакатда Нипаҳ вируси билан касалланиш ҳолатлари ҳамда унинг ҳудудга кириб келиши қайд этилмаган. Шунингдек, мамлакатдаги эпидемиологик вазият барқарор ва тўлиқ назорат остида.