Нильсен Трампдан Гренландияни “тинч қўйишини” талаб қилди

Кеча, 4 январь куни АҚШ Президенти Дональд Трамп Air Force One самолёти бортида журналистлар билан суҳбат чоғида Гренландияни аннекция қилиш қарорини яна бир бор ўртага ташлади.  Бироқ бу қарорни Греландия Бош вазири Йенс-Фредерик Нильсен кескин қоралаб, уни “хомхаёл” деб айтди. Бу ҳақда Нильсен ўзининг Facebook саҳифасида ёзди.  

Трамп Даниянинг ушбу ярим автоном ҳудудининг АҚШ таркибига ўтишини бир неча бор айтган. Бунга сабаб сифатида оролнинг мудофаа мақсадлари учун стратегик жойлашуви ва фойдали қазилмаларга бойлигини келтирган.

Оқ уй раҳбари журналистлар билан Air Force One самолёти бортидаги суҳбат чоғида, “Миллий хавфсизлик нуқтаи назаридан бизга Гренландия керак. Дания эса буни уддалай олмайди”, деб айтган.

“Биз икки ойдан кейин Гренландия ҳақида қайғурамиз... 20 кундан кейин Гренландия ҳақида гаплашамиз”, дейди Трамп

Дания Бош вазири Йенс-Фредерик Нильсен бунга жавобан, “энди етар” деган ва АҚШнинг Греландия ороли устидан назорат ўрнатиши ҳақидаги ғояни “хомхаёл” деб айтган.

“Бошқа босим бўлмасин. Бошқа шама ва киноялар бўлмасин. Аннекция ҳақидаги хомхаёлларга чек қўйилсин. Биз мулоқотга тайёрмиз. Биз муҳокамаларга тайёрмиз. Лекин бу тўғри йўллар орқали ва халқаро ҳуқуқни ҳурмат қилган ҳолда амалга оширилиши керак”, дейди Греландия Бош вазири

Бош вазир ўз баёнотида Дания (таркибда Греландия ҳам бор) НАТО аъзоси эканини ва у альянснинг хавфсизлик кафолати остида эканлигини қўшимча қилган. Шунингдек, АҚШнинг Греландия оролига кириш ҳуқуқини берувчи мудофаа битими аллақачон мавжудлигини ҳам таъкидлаган.

Қайд этиш жоиз, Греландиянинг келажаги ҳақидаги ушбу тортишувлар жорий йилнинг 3 январь куни АҚШ томонидан Венесуелага қарши амалга оширилган йирик ҳарбий операциядан сўнг содир бўлган. 

Эслатиб ўтамиз, аввалроқ Дания Ташқи ишлар вазири Ларс Лекке Расмуссен АҚШ Президенти Дональд Трампни Гренландияга “қўл теккизмасликка” чақирганди. Унинг айтишича, АҚШ томонидан оролга қилинган ҳар қандай ҳужум бутун Дания қироллигига қилинган ҳужум сифатида қабул қилинади.