Неймар Европага қайтмайдиган бўлди

Бразилиянинг “Сантос” клуби Неймар билан амалдаги шартномани узайтирганини маълум қилди. Ҳужумчининг янги меҳнат шартномаси 2026 йил якунига қадар амал қилади. Бу ҳақда клуб матбуот хизмати хабар берди.

Бу Неймарнинг “Сантос”га қайтганидан буён томонлар имзолаган учинчи келишувидир. Аввалроқ, 2025 йилда ҳар бири олти ойлик бўлган иккита қисқа муддатли шартнома тузилган эди. Энди эса томонлар 2026 йил якунига қадар мўлжалланган узоқроқ ҳамкорликка келишиб олди. Мазкур муддат клуб президенти Марсело Тейшейранинг амалдаги ваколат муддати якунига тўғри келади.

Маҳаллий ОАВ хабарларига кўра, Неймарнинг ҳозирги маоши “Сантос”даги тўрт ёки беш нафар оддий футболчининг умумий маошига тенг. Меҳнат шартномасидан ташқари, клуб футболчининг ота-онасига тегишли бўлган NR Sports компанияси билан алоҳида имиж ҳуқуқлари бўйича ҳам шартномага эга.

Эслатиб ўтамиз, аввалроқ  Неймар мавсум якунлангандан сўнг, медиал менискус йиртилиши сабабли операция қилинган эди.