Непалда икки вертолёт тўқнашиб кетди. Қурбон бор

Непалдаги Эверест чўққиси ҳудудида қўнишга тайёрланаётган иккита вертолёт тўқнашиб кетди. Бу ҳақда “Reuters” хабар берди.

\Ҳодиса бугун, 3 ноябрь куни Солухумбу округидаги Эверест чўққисининг базавий лагери ҳудудида юз берган. Бу ҳақда округ бош маъмури Каман Сингх Тапа Магар маълум қилган.

Қайд этилишича, вертолётлардан бири Fishtail Air, иккинчиси эса Dynasty Air компаниясига тегишли бўлган. Fishtail Air вакилининг айтишича, унинг вертолёти Эверест ҳудудидан қутқариб олинган сайёҳларни олиб кетаётган вақтда қўниш жараёнида ҳалокатга учраган.

Вертолёт бортида Ҳиндистон ва Янги Зеландия фуқаролари бўлган. Тўқнашув оқибатида Ҳиндистон фуқароси ҳалок бўлган, Янги Зеландия фуқароси эса жароҳатланган ва қутқариб қолинган. Ҳар икки йўловчи сайёҳ бўлган. Dynasty Air вакилининг маълум қилишича, унинг компаниясига тегишли вертолётда эса фақат юк бўлган.

Маълумот учун, айни пайтда Непалда сайёҳлик ва тоғга чиқиш мавсумининг энг гавжум даври давом этмоқда. Бу вақтда вертолётлар сайёҳлар ҳамда альпинистларни Эверест ҳудудига олиб бориш ва у ердан қайтаришда фаол фойдаланилади.

Эслатиб ўтамиз, аввалроқ Босния ва Герцеговинада Европа Иттифоқининг тинчликпарвар миссияси таркибида хизмат қилаётган Италия ҳарбий вертолёти ҳалокатга учрагани ҳақида хабар берилган эди.