Навальний жамоаси Франция ва Швейцарияни Путиннинг собиқ хотинининг мулкларини хатлашга чақирди

Россия мухолифати етакчиси Алексей Навальний жамоаси Россия Президенти Владимир Путиннинг собиқ рафиқаси Людмила Очеретная ва унинг ҳозирги турмуш ўртоғи Артур Очеретнийнинг мол-мулкини ҳибсга олиш талаби билан Франция ва Швейцария ҳукуматларига мурожаат қилди.

“Биз Очеретнийларнинг хориждаги мулки коррупцион пуллар эвазига сотиб олинганини исботладик ва Европа Иттифоқи бу активларни тортиб олишига умид қиламиз”, дейилади Коррупцияга қарши кураш фонди (ККФ) баёнотида.

Мухолифатчиларга кўра, тегишли таклифлар аллақачон икки давлат ташқи ишлар вазирликларига юборилган.

“Ишончимиз комилки, Путинга яқин одамларга нисбатан санкциялар сиёсий ва бизнес элитасини унинг қўллаб-қувватловидан воз кечишга мажбур қилади. Ва бу унинг режимини йўқ қилиш ва у Украинада бошлаган урушни тўхтатиш учун энг муҳим қадамдир”, дейди Навалнийнинг шериклари Путиннинг собиқ рафиқасига нисбатан олдинги терговга ишора қилиб.

Людмила Очеретная (аввал Путина) ҳақида ККФ суриштируви

Август ойи бошида ККФ Очеретнийлар ҳақида фильм чиқарди ва улар Москва марказидаги Воздвиженка кўчасида шаҳар ҳокимияти томонидан берилган тарихий қасрга эгалик қилишини даъво қилди. Тергов маълумотларига кўра, 2000-йилларда Людмила Путина ўзи учун махсус яратилган Рус тилини ривожлантириш марказини бошқарган. Москва мэрияси ва Президент ишлари бошқармаси марказга Кремль ёнидаги эски бинога эгалик ҳуқуқини берган. Икки қават таъмирланиб, қўшилгандан сўнг, у “Шахслараро алоқаларни ривожлантириш маркази” деб ўзгартирилди ва энди уни Людмиланинг янги эри бошқаради. У 2015 йилда иккинчи турмуш ўртоғининг фамилиясини олган.

Суриштирув муаллифларига кўра, Артур Очеретний хотинига тегишли бўлган 10 миллиард рубллик бинони “Меридиан”га ижарага беради, у эса уни “Сбербанк”, ВТБ ва бошқа тижорат лойиҳаларига ижарага бериб, йилига 250 миллион рублдан ортиқ даромад олади.

Тергов маълумотларига кўра, “Шахслараро алоқаларни ривожлантириш маркази” Москва мэрияси, “Газпромбанк” ва “Северсталь”дан ҳам маблағ олади, бу эса йилига яна 415 миллион рубль даромад келтиради, бу пулларни Артур Очеретний компанияси “Меридиан”га қарзга беради. Бу пулга у Франция, Швейцария ва Испания жанубида квартира ва уйлар сотиб олади. Хусусан, эр-хотин Биаррицдаги виллага, Давосдаги квартирага ва Малагадаги иккита квартирага эгалик қилади ва хориждаги кўчмас мулкнинг умумий қиймати деярли 600 миллион рублга баҳоланади. Шу билан бирга, Очеретне Европа Иттифоқининг санкциялар рўйхатига киритилмаган.

Бир неча йил олдин “Reuters” ҳам Людмила Путинанинг Москвадаги ижараси бизнесидан тушган даромади ҳақида суриштирув эълон қилган.