НАТО Украинадаги можаронинг бир қисми бўлмайди – Шольц
Олам
−
26 Июнь 5695
Германия канцлери Олаф Шольцнинг айтишича, НАТО Украинадаги можаронинг бир қисми эмас ва бўлмайди ҳам. Бу ҳақда у Бундестагда сўз очди.
“НАТО саммитида Украинани қўллаб-қувватлашни мувофиқлаштириш ва [Украина Қуролли Кучларини] тайёрлашда унинг ролини кучайтириш муҳокама қилинади. Шу билан бирга, бу аниқ ва мен учун шуни айтишим муҳим: биз қилаётган иш туфайли НАТО можаронинг бир қисми бўлмайди. Биз бу чегарани кесиб ўтмаймиз”, дейди Шольц.
Канцлер НАТО доирасида бу масалада якдиллик борлигини таъкидлади.
“Трансатлантик хавфсизлик муҳим аҳамиятга эга, шу жумладан Украина учун хавфсизлик истиқболлари ҳақида ўйлаганимизда”, деб таъкидлайди Шольц.
Маълумот учун, 9-11 июль кунлари АҚШ пойтахтида НАТОнинг навбатдаги саммити бўлиб ўтади. Америка маъмурияти вакиллари Киев Вашингтондаги учрашувда Шимолий Атлантика альянсига қўшилиш таклифини олмаслигини бир неча бор таъкидлаган.
2023 йил 11 июлда Вильнюсдаги НАТО саммитида якуний баёнот қабул қилинди, унда Украинанинг альянсда келажаги борлигига ишонч билдирилди, аммо НАТОга қўшилиш таклифи Киевга “иттифоқчилар бир келишувга келганда ва Киев олдига қўйилган шартларга риоя қилинганда юборилиши мумкинлиги” таъкидланди. Қабул қилишнинг тахминий вақти айтилмаган.
Вильнюсдаги саммит олдидан Киевдан аъзоликка таклифнома олиш истаги ҳақида қатъий баёнотлар янграган.
2022 йил сентябрида Украина Шимолий Атлантика альянсига тезлаштирилган асосда қўшилиш учун ариза берди.
НАТО Украина можаро ҳолатида экан, альянсга қўшилиш мумкин эмаслигини бир неча бор таъкидлаган.
Live
Барчаси
