Нью-Йоркда иммиграция агентлари боласи билан машинада кетаётган эркакни отди

АҚШнинг Нью-Йорк шаҳрида Иммиграция ва божхона назорати хизмати (ICE) агентлари махсус амалиёт вақтида машина ичида 5 ёшли бола бўлган эркакни отиб, яралади. Бу ҳақда CNN хабар берди.

Ҳодиса кеча, 8 октябрь куни соат 16:00 ларда, шаҳарнинг Бронкс ҳудудида содир бўлган. 28 ёшли Оскар Белгал исмли эркак автомобилини тўхташ жойига қўяётган пайтда оддий кийимдаги федерал агентлар унинг машинасига яқинлашган. Улардан бири ҳайдовчи томонидаги ойнга қурол ўқталган, яна бири эса автомобилнинг олд қисмига келган. Шундан сўнг машина олдинга ҳаракатланган ва агентлардан камида бири унга қарата ўқ узган.

Нью-Йорк полицияси комиссари Жессика Тишнинг айтишича, воқеа жойида тўпланган далилларга кўра, камида битта ICE агенти етти марта ўқ узган. Ўқлардан бири эркакнинг чап қулоғи остидаги бўйин қисмига теккан. Полиция кузатув камералари ҳодисани қисман тасвирга олган, бироқ ўқ узилган лаҳза ёзувда акс этмаган.

Ҳуқуқ-тартибот идораларидаги манбага кўра, эркакнинг бўйнига ўқ тегиб, у енгил яраланган. Унинг жароҳати ҳаёт учун хавфли деб баҳоланмаган ва у шифохонага олиб кетилган. Машинанинг орқа ўриндиғида бўлган 5 ёшли боланинг жароҳат олмагани маълум қилинган. Полиция комиссари боланинг яраланган эркакнинг ўғли эканини тахмин қилмоқда. Бола кейинчалик оила аъзоларига топширилган.

Нью-Йорк мэри Зохран Мамдани ҳодисадан ғазабда эканини билдирган. Унинг айтишича, ICE агентлари эркакнинг машинасини ўраб олган, бироқ улар юзларини ниқоб билан яширган ва қурилиш ишчиларига хос нимчалар кийган. Шу сабабли уларни федерал агентлар сифатида таниб олиш қийин бўлган.

“Худога шукрки, бола жисмонан зарар кўрмади”, деган Мамдани.

Мамдани АҚШ Президенти Дональд Трамп ва Ички хавфсизлик вазири Марквейн Маллин билан гаплашиб, яраланган эркакни озод қилиш масаласини муҳокама қилганини айтган. Бироқ музокаралар натижа бермаган. Эркак полициядан Иммиграция ва божхона назорати хизмати ихтиёрига ўтказилган.

АҚШ Ички хавфсизлик вазирлиги эркакнинг Тринитариос жиноий тўдаси билан алоқаси борлигини, аввал йирик миқдордаги ўғрилик учун судланганини, шунингдек, ҳужум, талончилик, гиёҳванд моддалар ва қурол сақлаш билан боғлиқ ҳолатлар бўйича илгари қўлга олинганини билдирган. Вазирлик агентлар эркак яраланганидан сўнг дарҳол унга ёрдам кўрсатганини ҳам маълум қилган.

Ҳодиса вақтида яна икки агент жароҳат олган ва улар ҳам шифохонада даволанмоқда. Федерал расмийлардан бири агентлардан бири автомобил ҳалокати оқибатида жароҳатланган бўлиши мумкинлигини айтган. Бироқ бу ҳолат эркакни қўлга олишга уриниш билан боғлиқми ёки йўқми, ҳозирча номаълум.

Воқеа гувоҳлари полицияга ёрқин сариқ қурилиш нимчасини кийган, қўлида қурол бўлган эркакни кўрганини айтган. Улар, шунингдек, беш-олтита ўқ овозини эшитганини ва одамларнинг бақирганини билдирган. Ҳодиса жойидан олинган видеода эса шундай кийимдаги эркак ярим автоматик милтиқ ушлаб тургани ва бўйнига ICE нишонини таққани кўринади.

Нью-Йорк полицияси ҳодисада иштирок этмаганини билдирган. Отишмадан кейин полиция ходимлари воқеа жойида тартибни сақлаш ва далилларни йиғиш учун сафарбар қилинган. Кейинчалик Ички хавфсизлик вазирлигининг Тергов бошқармаси ходимлари терговни ўз зиммасига олган. Эркакнинг автомобили эвакуатор ёрдамида олиб кетилган, унинг олд ойнасида ўқ теккан тешик бўлган.

Эслатиб ўтамиз, аввалроқ АҚШнинг Калифорния штатида “The New York Times” нашрининг “Games” хизмати муҳандислик директори Жонатан Маккинси отиб ўлдирилганди.