МЮ ўйини олдидан Фергюсон шифохонага ётқизилди

“Манчестер Юнайтед”нинг собиқ бош мураббийи Сэр Алекс Фергюсон Англия Премьер-лигаси доирасидаги МЮнинг “Ливерпуль”га қарши ўйини олдидан ўзини ёмон ҳис қилди ва шифохонага ётқизилди. Бу ҳақда “Daily Mail” нашри хабар берди.

Манбага кўра, 84 ёшли мутахассис учрашув бошланишидан тахминан бир соат аввал шифохонага олиб кетилган. У эҳтиёт чораси сифатида шифокорлар назоратига олинган бўлиб, тез орада уйига жавоб берилиши кутилмоқда.

Алекс Фергюсон “Манчестер Юнайтед” тарихидаги энг муваффақиятли мураббий ҳисобланади. У жамоани 1986 йилдан 2013 йилгача бошқарган ва шу даврда клуб билан 13 марта Англия Премьер-лигаси чемпионлигини қўлга киритган. Умуман олганда, унинг бошқаруви остида жамоа 38 та совринга эга чиққан.

2013 йилда мураббийлик фаолиятини якунлагач, Фергюсон клубда элчи ва бошқарув аъзоси сифатида ишлашда давом этди. 2024 йил октябрь ойида клубнинг янги эгаси Жим Рэтклифф ҳамда INEOS томонидан унинг йилига 2,16 миллион фунт стерлинг миқдоридаги элчилик шартномаси харажатларни қисқартириш мақсадида бекор қилинди. Шунга қарамай, Фергюсон клубнинг ижрочи бўлмаган директори лавозимини сақлаб қолган.

Маълумот учун, 2018 йил май ойида Фергюсон миясида қон кетиши туфайли шошилинч жарроҳлик амалиётини бошдан кечирган эди. Операция муваффақиятли ўтган ва у кейинчалик тўлиқ соғайган.