Музокараларсиз Украина Афғонистонга айланади – Орбан 

Европа Иттифоқи давлатлари Украина можаросини ҳал қилиш бўйича музокараларни бошлаши керак, акс ҳолда Украина Европа Иттифоқи учун Афғонистонга айланади. Бу ҳақда Венгрия Бош вазири Виктор Орбан NZZ газетасига берган интервьюсида сўз очди.

Унинг фикрича, айни дамда мамлакатлар орасида дипломатия зарур. 

“Бизга ҳозир дипломатия керак. Европаликлар музокаралар олиб бормасликни ахлоқий деб ҳисоблайди. Бу бемаънилик! Буни уруш пайтида қилиш керак! Акс ҳолда, уруш Украина бутунлай вайрон бўлгунча давом этади ва у Афғонистонга айланади”, деган Бош вазир. 

Орбаннинг айтишича, бугунги кунда Украина давлатига фақат сулҳ ва тинчлик битимигина ёрдам бера олади. 

“Тотал уруш бошламагунимизча Украинанинг ғалаба қозониши мумкин эмаслиги бошидан маълум эди. Бу вариант кўриб чиқилмади. Бугун биз Украинага фақат сулҳ ва тинчлик билан ёрдам бера оламиз”, деган Орбан. 

У, шунингдек, АҚШ собиқ президенти Жо Байден Россия армиясини заифлаштира олмагани ва ҳаммаси унинг айби эканини қўшимнча қилган. 

Орбаннинг сўзларига кўра, Ғарб энди АҚШ Президенти Дональд Трамп каби “кучли сиёсатчи”нинг аралашувига муҳтож. 

“Айнан у “Гордиан тугунини” кесиш ва Россия ва Украина ўртасида сулҳ тузишга ёрдам беришга қодир”, дея қўшимча қилган Венгрия ҳукумати раҳбари. 

Эслатиб ўтамиз, аввалроқ Европа Иттифоқига раислик қилувчи Польша Бош вазири Дональд Туск Венгрия Бош вазири Виктор Орбанни Россия Федерациясига қарши санкцияларни узайтиришга вето қўйса, бунинг оқибатлари билан таҳдид қилганди. Дональд Тускнинг ёзишича, агар Венгрия Бош вазири Европа санкцияларини тўсиб қўйса, Путин томонга ўйнаётган бўлади.