Муваффақиятга эришмадим – Трамп Путин билан суҳбат ҳақида

АҚШ Президенти Дональд Трамп Россия етакчиси Владимир Путин билан телефон орқали суҳбат чоғида Украинадаги Россия урушини тугатиш масаласида ҳеч қандай муваффақиятга эришмаганини айтди. Бу ҳақда у кеча, 3 июль куни Вашингтон яқинидаги Эндрю ҳарбий базасида журналистларга маълум қилди.

“Бу жуда узоқ суҳбат бўлди, биз кўп нарсаларни, жумладан Эрон ҳақида, шунингдек, сиз билганингиздек, Украина билан уруш ҳақида гаплашдик. Ва мен хурсанд эмасман. Мен у билан (Путин) ҳеч қандай муваффақиятга эришмадим”, деди Америка раҳбари.

Бундан ташқари, Америка етакчиси АҚШ Киевга қурол етказиб беришда давом этаётгани ҳақида баёнот берди.

“Биз қурол бераяпмиз, улар билан (украиналиклар) ишлаяпмиз ва уларга ёрдам беришга ҳаракат қиляпмиз. Биласизми, Байден уларга қурол бериб, бутун мамлакатимизни вайрон қилди ва биз қуроллар ўзимизда етарли эканига ишонч ҳосил қилишимиз керак”, деди у.

Кремлга кўра, январь ойидан бери Путин ва Трамп ўртасидаги олтинчи расмий телефон мулоқоти 3 июль куни деярли бир соат давом этган.

“Сиёсатчилар Сурия, Эрон ва Яқин Шарқдаги вазиятни ҳам муҳокама қилдилар”, деди Россия Президенти ёрдамчиси Юрий Ушаков.

Ушаковнинг сўзларига кўра, шахсий учрашув ҳақида гап бўлмаган, аммо “бу ғоя ҳавода айланиб юрибди”.

Аввалги суҳбат июнь ойининг ўрталарида, Путин Яқин Шарқ бўйича келишув бўйича воситачи сифатида ўз номзодини таклиф қилган пайтда бўлиб ўтган эди.

Британиянинг “Financial Times” газетасининг ёзишича, Трамп бугун, 4 июль куни Украина Президенти Владимир Зеленский билан телефон орқали мулоқот қилади. Украина расмийлари AFP агентлиги билан суҳбатда Киевда бу қўнғироққа “тайёргарлик кўрилаётганини” тасдиқлади.

Эслатиб ўтамиз, олдинроқ Пентагон АҚШнинг ушбу қурол-яроғ захиралари жуда озлигидан хавотирга тушиб, Киевга Patriot ҳаво мудофаа ракеталари, Hellfire ракеталари ва бошқа аниқ артиллерия ўқ-дориларини етказиб беришни музлатиб қўйгани хабар қилинганди. Бу қуролларни етказиб бериш Киев билан Байден маъмурияти томонидан келишилган.