Москвада бензин ва дизель сотувига лимит қўйилди

Россиянинг Москва шаҳридаги бир қатор автоёнилғи қуйиш шохобчаларида (АЁҚШ) ёнилғи сотишга чекловлар жорий этилди. Бу ҳақда “Bloomberg” хабар берди.

Нашр маълумотларига кўра, “Татнефть” АЁҚШларида бир мижозга 20 литрдан кўп бўлмаган AI-92 ва AI-95 бензини, шунингдек, 40 литргача дизель ёнилғиси берилмоқда. “Роснефть” ёнилғи қуйиш шохобчаларида лимит битта бак ёки канистра учун 90 литргача, “Лукойл” АЁҚШларида эса битта чек учун 100 литргачани ташкил этмоқда.

Бундан олдин чекловлар ОРТК тармоғида ҳам амал қилган бўлиб, у ерда бир харидорга бензин бериш 60 литр, дизель ёнилғиси эса 100 литр билан чекланган. Ҳозирги вақтда компания ушбу чоралар бекор қилинганини даъво қилмоқда.

Россия ОАВларининг хабар беришича, сўнгги ҳафталарда мамлакатнинг бир қатор бошқа ҳудудларида ҳам ёнилғи сотишга чекловлар жорий этила бошлаган. Ушбу вазият фонида Кремль айрим ҳудудларни бензин билан таъминлашда қийинчиликлар мавжудлигини тан олган ва расмийлар вазиятни барқарорлаштириш устида иш олиб бораётганини маълум қилган.

“Bloomberg”нинг қайд этишича, чекловлар Россия нефтни қайта ишлаш инфратузилмасига қилинган дрон ҳужумларидан кейин ёнилғи етказиб беришдаги муаммолар ва нефтни қайта ишлаш ҳажмининг камайиши фонида жорий этилмоқда.

Эслатиб ўтамиз, аввалроқ Украина дронлари Россиянинг Нижний Новгород вилоятидаги Кстово шаҳрига ҳужум уюштирганди. Ушбу ҳужум “Лукойл-Нижегороднефтеоргсинтез” йирик нефтни қайта ишлаш заводига қаратилган бўлиб, ҳужум оқибатида ҳудудда ёнғин юзага келган.