Москвада 10 майга қадар интернет узилиб туради

Россиянинг Москва шаҳрида мобил интернет жорий йилнинг 10 май кунига қадар чекловлар билан ишлаши мумкин. Бу ҳақда Россия Президенти матбуот котиби Дмитрий Песков бугун, 7 май куни журналистлар билан бўлиб ўтган матбуот анжумани чоғида сўз очди.

Маълум қилинишича, Песков бу чекловларни аҳоли тўғри қабул қилиши кераклигини айтган.

“Бу узилишлар эмас, бу аниқ сабабларга кўра, мобил интернет ишидаги чекловлар. Албатта, буни тўғри тушуниш керак”, Песков.

Шунингдек, Песков бу чораларни “хавфли қўшничилик” алоқалари билан боғлаб кетган.

Журналистларнинг “Кремль аниқ қайси вақтларда интернет тармоқларида чеклов бўлишини айта оладими?” деган саволига Песков “Йўқ. Бу заруратга қараб амалга оширилади”, дея жавоб берган.

Олдинроқ, Россия Фавқулодда вазиятларнинг олдини олиш ва уларни бартараф этиш ягона давлат тизими ҳам байрам тадбирлари хавфсизлигини таъминлаш билан боғлиқ интернет тармоғида юзага келиши мумкин бўлган муаммолар ҳақида хабар берган.

Россия матбуотига кўра, ушбу чекловлар Иккинчи жаҳон урушида қозонилган ғалабанинг 80 йиллиги юбилейига тайёргарлик учун амалга оширилмоқда.

Маълумот учун, Москвада жорий йилнинг 9 май куни бўлиб ўтадиган ҳарбий парадга 20 дан ортиқ давлат раҳбарлари келиши кутилмоқда. Улар орасида Марказий Осиё давлатлари Президентлари ҳам бор.

Эслатиб ўтамиз, аввалроқ Путин Украинада 8-10 май кунлари бир томонлама равишда ўт очишни тўхтатишни эълон қилган ва бу қарорга Иккинчи жаҳон урушида Германия устидан қозонилган ғалабанинг 80 йиллиги ва “гуманитар мулоҳазалар” сабаб қилиб кўрсатган эди.

Кремль Киевни “бундан ўрнак олишга” чақирганди ва ўт очишни тўхтатиш режими бузилган тақдирда “адекват ва самарали жавоб” билан таҳдид қилганди.
Шундан сўнг, Украина Президенти Владимир Зеленский Иккинчи жаҳон урушида Германия устидан қозонилган ғалабанинг 80 йиллиги нишонланиши муносабати билан Украинада 8 майдан 10 май ярим тунгача давом этиши керак бўлган уч кунлик сулҳ ҳақидаги баёнотларини “манипуляция”, деб атаганди.