Москва-Баку можароси фонида Зеленский Алиевни қўллаб-қувватлади

Кеча, 1 июль куни Украина ва Озарбайжон Президентлари Владимир Зеленский ва Илҳом Алиев телефон суҳбатида Москва ва Баку ўртасидаги муносабатлар билан боғлиқ вазиятни муҳокама қилди. Бу ҳақда Зеленский ўзининг Telegram-каналида маълум қилди.

У Россия Озарбайжон фуқароларини масхара қилаётган ва Озарбайжон Республикасига таҳдид солаётган вазиятда Украинанинг Бакуни қўлловини билдирди.

Украинанинг Президенти ака-ука Ҳусайн ва Зияддин Сафаровларнинг Екатеринбургда ҳибсга олинганидан кейин ўлим топганини “қотиллик” деб атади ва Украина жамоатчилиги номидан Озарбайжон Президентига ҳамдардлик билдирди.

“Ишончим комилки, барча далиллар аниқланади. Ва адолат талаб этилади”, деди Зеленский.

Алиев Зеленскийга ҳамдардлик сўзлари учун миннатдорлик билдирган. 

Бундан ташқари, Владимир Зеленский Илҳом Алиевга Украинани, унинг ҳудудий яхлитлиги ва халқини қўллаб-қувватлагани,  шу жумладан украиналикларни Эрондан эвакуация қилишда Озарбайжон кўрсатган ёрдами учун миннатдорлик билдирди.

Президентлар, шунингдек, икки томонлама муносабатлар, энергетика, гуманитар соҳадаги ҳамкорликни муҳокама қилди ва Бакуда Иқтисодий ҳамкорлик бўйича ҳукуматлараро комиссиянинг йиғилишини ўтказишга келишиб олди.