Молия вазири: “Бюджет тақчиллиги бўлиши мумкин...”

Коронавирус пандемияси натижасида Ўзбекистонда бюджет тақчиллиги юзага келиши мумкин. Бу ҳақда Молия вазири Тимур Ишметов онлайн брифингда маълум қилмоқда. 

“Рақамларга қарайдиган бўлсак, йил бошида ялпи бюджет тақчиллиги прогнозлари ЯИМга нисбатан 2,7 фоиз бўлса, бу жами фискал тақчиллик. Бу ерда консолидациялашган тақчиллик 0,5 фоиз бўлиб, ташқи қарзлар билан боғлиқ харажатлар ҳам ҳисобга олинганда 2,7 фоиз бўлиб чиққан. Янгиланган дастлабки ҳисоб-китобларга кўра, бюджет тақчиллиги йил бошидаги прогнозларга қўшимча яна 2 фоиз бандга ошиши кутилаяпти. Бу дастлабки прогнозлар.  

Бу Ўзбекистон учун салбий оқибатларга олиб келмайди. Албатта, биз барча макроиқтисодий кўрсаткичларга эришамиз. Яна бир марта айтаман, ҳозирги вақтда қанчалик қийин бўлмасин ҳукуматнинг асосий вазифаси Президент топшириғига асосан одамларни касалликдан сақлаб қолиш ва бунинг учун барча керакли харажатлар билан таъминлаш, шунингдек бунинг натижасида келиб чиқадиган макроиқтисодий кўрсаткичлар билан кенг курашишдир. Яъни, бизда тарози палласида одамларнинг ҳаётини сақлаб қолиш учун харажат бўлса, иккинчи томондан қандайдир иқтисодий кўрсаткичлар юзага келади. Бунда аввал ўша харажатларни таъминлаб, натижада юзага келадиган кўрсаткичлар билан кенг шуғулланишдир”, дейди Тимур Ишметов.

Молия вазири касалликн тарқалишини олдини олиш учун қанча харажат бўлса, ҳукуматнинг имконияти етишини айтмоқда. 

“Инқирозга қарши жамғармага 10 триллион сўмлик маблағ жамланган бўлса, бу бирламчи қадамлар учун мўлжалланган. Агар яна харажат керак бўлса, албатта, ўша харажат ҳам қилинади. Шунга мувофиқ, бирламчи прогнозимиз бюджет тақчиллиги ошиши дейилмоқда. Балки келажакда яна ҳам ошар, лекин бу билан ҳеч қандай хавотирга ўрин йўқ. Негаки, бизнинг етарли фискаль буферларимиз бор”, дея қўшимча қилди вазир.