Модининг қасамёд қилиш маросимида 7 давлат етакчилари қатнашади

Ҳиндистон Бош вазири лавозимини қаторасига учинчи марта эгаллайдиган Нарендра Модининг қасамёд қилиш маросимида етти нафар давлат ва ҳукумат раҳбари иштирок этади. Бу ҳақда республика Ташқи ишлар вазирлиги хабар берди.

“2024 йилги умумхалқ сайловларидан кейин Бош вазир Нарендра Моди ва Вазирлар Кенгаши аъзоларининг қасамёд қабул қилиш маросими 2024 йил 9 июнга белгиланган. Шу муносабат билан Ҳиндистоннинг Ҳинд океани минтақасидаги қўшни давлатлари раҳбарлари фахрий меҳмонлар сифатида самимий таклиф қилинди”, дейилади ТИВ баёнотида.

Маросимда иштирок этиш таклифини Бангладеш Бош вазири Шайх Хасина, Бутан ҳукумати раҳбари Церинг Тобгай, Маврикий Бош вазири Правинд Жугнот, Малдив ороллари Президенти Моҳамед Муиззу, Непал Бош вазири Пушпа Камал Даҳал, Сейшел ороллари вице-президенти Аҳмад Афиф, Шри-Ланка Президенти Ранил Викрамасингхе қабул қилди.

“Раҳбарларнинг Бош вазир Нарендра Модининг кетма-кет учинчи муддатга қасамёд қилиш маросимида иштирок этиш учун ташрифи Ҳиндистон ўзининг “Биринчи навбатда қўшнилар” сиёсатида қўяётган энг юқори устувор йўналишга мос келади”, дейилади Ҳиндистон ТИВ баёнотида.

Ҳиндистонда 19 апрелдан бери етти босқичда ўтган парламент сайловлари жараёни 4 июнь куни якунига етди. Ҳаммаси бўлиб, сайловларда ғалаба қозонган Миллий демократик альянс, асосий куч Модининг Ҳиндистон халқ партияси ("Бҳаратия Жаната" партияси, БЖП) овоз бериш натижаларига кўра, келажакдаги парламентнинг қуйи палатаси таркибидаги 543 ўриндан 293 ўринни эгаллади.

Кеча, 7 июнь куни Ҳиндистон Президенти Драупади Мурму Модига мамлакат учун янги ҳукуматни шакллантириш вазифасини топширди. У кетма-кет учинчи марта Бош вазир бўлади.