Мирзиёев “клан”чиликка қарши кескин кураш олиб бориш ҳақида гапирди

Ўзбекистон Республикаси Президенти Шавкат Мирзиёев бугун, 26 январь куни мамлакат бошқарувида “клан”чиликка барҳам бериш ҳақида гапирди. 

“Ҳар бир сўзимиз, ҳар бир хатти-ҳаракатимиз жамиятга, одамлар қалбига қандай таъсир кўрсатишига ҳар қачонгидан ҳам кўпроқ эътибор беришимиз зарур. 

Давлат тузумини ичидан емирадиган, ижтимоий барқарорлик кушандаси бўлган коррупция балосига қарши, бюрократиянинг ҳар қандай кўринишларига, одамларни менсимаслик, маҳаллийчилик ва гуруҳбозлик иллатларига қарши барчамиз кескин кураш олиб боришимиз керак”, дейди давлат раҳбари.

Президент кўпни кўрган, мард ва олижаноб, меҳнаткаш ва бағрикенг Ўзбекистон халқи билан биргаликда Янги Ўзбекистонни – инсон тинч, озод ва фаровон яшайдиган, эзгу мақсадларини эмин-эркин амалга оширадиган давлат ва жамиятни, албатта, барпо этишига ишонч билдирган. 

“Бунинг учун бизда барча сиёсий, иқтисодий, маданий-маърифий асослар, энг муҳими, кучли хоҳиш-ирода ва қатъий интилиш бор”, деди давлат раҳбари сўзининг якунида.